《中年好聲音3》100強止步的「中三生」禤振華（Dave）最近憑一段「酒樓奇遇記」意外爆紅！事緣Dave在酒樓登台時，竟被七旬阿婆「霸王硬上弓」連環索吻，更戲劇性塞500蚊要求「回吻」，影片流出後網民齊嘆「歌手難撈」。面對「做x」、「樂壇垃圾」等惡評，Dave首度開腔強調冇吃不消，更唔覺可恥：「婆婆開心咪得囉！」他更自封「新一代師奶殺手」幽默解畫。
禤振華與七旬阿婆素未謀面
40歲禤振華未婚，但已有固定女友。現職首飾銷售員的Dave熱愛唱歌，亦是業餘歌手，出戰《中聲3》後跟一班志同道合的「中三生」區瑞明、揚溢、姚芷慧等組成超聲團，更於「區瑞強70大SHOW演唱會」中演出，之後還會出歌。由於被指貌似劉錫明、森美、陳鍵鋒，Dave吸引老中青鐵粉，不過，卻與短片中的七旬阿婆素未謀面。
相關閱讀：《中年好聲音3》參賽者酒樓登台片瘋傳 被塞500元錫阿婆面珠 熱情互動惹側目網嘆搵食艱難
禤振華：氹下佢冇乜所謂
Dave首開腔向《星島頭條》生動還原當晚「吻襲」經過：「當晚應主辦方邀請唱酒樓騷，期間邊唱郭富城嘅《狂野之城》，邊落台同觀眾握手互動，當時有好多觀眾興奮埋身，場面大混亂，行到婆婆身邊時，佢就好熱情咁捉實我搵我影相，表現到好鍾意、好欣賞我唱歌，跟住婆婆喺冇預警下情不自禁（連環錫面）。」Dave冇裝假，認被婆婆熱情舉動嚇親，雖然算不上尷尬，但就有少少怕醜：「會有啲不知所措！之後佢仲示意我錫返佢，我諗住𠱁婆婆開心，咪搞下氣氛講笑話『我咁大個仔未錫過女仔嘛！』點知佢竟然好認真回答『我唔係女仔嚟㗎！』」對於今次「遇襲事件」，他剖白感受：「既然婆婆咁支持我，見到佢咁開心我都開心嘅，氹下佢冇乜所謂啦，我冇抗拒佢，我哋做呢行主要係娛樂觀眾，觀眾開心咪得囉，就算去探訪老人院都會送上擁抱，只要心態正常就得。」
禤振華唔覺出手太低
Dave唯一澄清，他不知道婆婆在銀包取錢給他：「當時冇諗過呢樣嘢，只係帶點不知所措，想有人過嚟幫手緩和下，快啲完成件事。」被問到阿婆要求他回吻，只打賞500元出手是否太低？Dave解釋：「又唔會！咁呢行登台時收利是及禮物好平常，利是多少冇關係，只係代表有鼓勵性，我嘅心態係佢表示鍾意我，感到開心咁我就接受，冇諗過要出賣啲乜；相反，我亦相信婆婆唔係用500蚊買啲乜嘢…總之只係娛樂一場，講到底，能被網絡瘋傳，有爆紅感覺又幾舒服及開心嘅。」Dave還「自抽」幽自己一默：「我知，搵食艱難嘛…咁個個人搵食都艱難㗎啦，最重要箇中尋找到樂趣，好似我鍾意唱歌咁，就唔覺得艱難。」他再補充話要多謝婆婆：「始終做娛樂圈多人認識係好事，希望下次大家會注意返我啲歌。」他還笑住溫提，日後有機會再遇上熱情婆婆，請她「溫柔」返少少。
禤振華不覺可恥
縱使事件惹來關注，他卻強調冇畀人笑到面黃，更加不覺可恥，故對於「做x」、「樂壇垃圾」、「嘔心」、「肉酸」等惡意抨擊會盡量不看：「香港言論自由講乜都得，最重要知道自己唔係，我又唔係做咗啲乜，唔覺得唔光彩喎，只要做嘅嘢係正確，做好自己就ok，我見都有留言話我係『新一代師奶殺手』，哈！呢個名我都幾鍾意。」經此一役他已學精，懂得保護自己：「下次我會企返開少少，要保持距離，如果避無可避，只能說『不』、『唔好意思』，或者日後多啲同fans聚會，成日見到嘅話，佢哋就唔會對我咁肉緊喇。」
