世事瞬息萬變，故此，做分析，無論涉及任何領域（政治、時事、經濟、金融……），皆應按客觀形勢而改變，不可一本通書睇到老。
小弟最怕遇上不用腦只盲從但又不識轉膊者，當某種投資因大勢轉變而急跌時（升時冇人會出聲），就變大喊十猛怨——你嗰陣話到樓市股市幾咁好，結果如今跌到叫阿媽，俾你累死囉。
純盲從永遠是失敗者
呢類人，永遠是失敗者，因自己唔分析，純盲從，形勢已變又唔識變，點會唔蝕死？
一如早年個個話滙控（005）穩如泰山，但當其管理層下錯決定，變成「國際銀行」，將主體業務搬離香港後，股價即試過由超過150元插至30元左右，你記得嗎？
若滙控苦主只搵早年睇好的評論員又怨又罵，合理嗎？凡投資，並冇舊時乜乜，只有今時物物，按時勢調整策略，才是明智投資者。
再舉一例，本欄讀者必知，我在領展廿年前上市的第一天已不斷呼籲大家買，不停買，有錢就買，因這隻股票大大超值，唔買就笨。一切不是靠估，而是計算其擁有的商場及車位市值，再比對其股價。結果，此股果然如火箭般上升，最癲去到2019年超過90元。
40元左右慢慢沽領展
由10元變90元，揸咗的，當然笑到傻。但當股價升過50元後，小弟已不提，因明顯開始over price，我也不再入。
結果又如何？領展管理層見如此好景，銀行大量信貸任借，於是心紅了，開始不務正業，集中火力開拓海外市場，在香港又興建新物業，最最不智，竟參與發展地產，踩入自己不在行的領域，結果食正轉角市兼經濟衰退，再遇美國加息，一連串負面因素下，搞到要供股，令股價曾跌近30元。
最令人遺憾，為其總裁王國龍的自私行為，先決定供股，引小股東上艇，然後就「叫人衝，自己鬆」，自己沽公司股票。是否非常不道德？
總而言之，領展與我20年前不斷推介時的客觀形勢，完全變質，大家應睇位減持。我會在40元左右慢慢沽，越升越沽。
資深傳媒人 曾智華
相關文章：燒掉百億仍未見家鄉︳ 曾智華
