(曾智華)
香港商界兩大傳奇人物，一為李兆基，剛剛上天堂，另一為李嘉誠，依然活躍，在「碼頭風雲」仍未平息的日子，由佢一手自己設計好，或由公關高手導演好，竟可氣定神閒笑意盈盈出現養和醫院，為捐贈癌症最新治療儀器作「完美亮相」。
無論你點猜度誠哥動機，總之，公眾形象上，佢永遠能以從容態度話畀大家知，無論外邊怎樣炮聲隆隆，但——I’m still good，don’t worry！
小弟將誠哥捐儀器相片上載個人社交平台，犀利，半日已吸數千Like，成為近月之冠，可見其人氣何等旺盛。
事實，我並不認識超人，也覺得佢家族多年來在香港的經商手法，部分頗具爭議性。不過，必須承認，百分百佩服其人生鬥志與睿智，任何在別人眼中的危機，佢皆能做到兵來將擋，水來土掩，功力遠比其他富豪勁，級數絕對彈離。
說來，小弟認識不少成功商人（講明並非老友呀），大都堅守一個原則——從商一定鋪鋪鍊盡，次次仙仙計較，好勝永遠顯示超強，不過，一到行善領域，則應出手豪邁闊綽，主攻教育、醫療及科技。
我也曾問過：「為乜唔多捐社會福利？」
不少答曰：「福利養懶人！教育為訓練一個人質素的基本，有學識，自然有工作，何須靠食福利？再者，一個城市、一個國家要強大，必須先掃除文盲，將普及知識提高，如此，競爭力也會提高，這才是國富家強之道。」
所以你無論去到邊間大學，都會發覺滿是以富豪、富豪太太、富豪父母命名的大樓。
回說誠哥，如今受攻擊指「唔愛國」，但我的確見證佢多年捐給內地的善款相當龐大，單單汕頭大學的一筆，已頗驚人。
