入行僅7年,29歲出爐視后蔡思貝向來好進取,近日被爆因拍金飾廣告而認識有米廣告商Sam,並獲經已成為「人夫」,仲有位同居女友羅彩玲嘅Sam照顧疑做「三奶」,在台慶頒獎禮當晚獲對方出動私伙座駕接載離開電視城,駛往有「明星屋苑」之稱嘅西貢匡湖居獨立屋,忽然變得好富貴。

有指貴為金飾商老闆的Sam身家雄厚,他在社交網不時都會炫富,名貴跑車不在講,更豪晒大箱現金,蔡思貝搭上他之後,不但揹限量版名牌包包,今期《東周刊》亦爆她「升呢」由北角舊居搬往西貢匡湖居獨立屋居住,甚至TVB台慶頒獎禮獎座,都係由Sam金飾品牌贊助,加上喺TVB落大量廣告為TVB帶嚟唔少盈利,作為該金飾品牌代言人嘅蔡思貝自然手執半個視后杯耳,成功撼嬴龔嘉欣,背後金主居功不少。

2019年底蔡思貝被爆與胡鴻鈞(Hubert)暗撻,仲借埋胡鴻鈞胞姐胡嘉雯嘅「波子」嚟代歩,親蜜關係不言而喻,不過,隨住思貝喺台慶頒獎禮將胡鴻鈞由「好友」降呢到唔同範疇嘅「朋友」後,Hubert 坦承蔡思貝近期冇再向姊姊借車。至於蔡思貝就忽然富貴解畫:「之前報道話我借胡鴻鈞家姐嘅車,Sam哥睇到後就問我需唔需要相熟司機嘅聯絡電話?咁樣出入去做嘢會方便一啲,所以我去做嘢就會聯絡呢位司機,但每次都有計番錢畀佢,所以冇乜特別。」