MIRROR成員AnsonLo(盧瀚霆)第二首派台作品《Burn Out》將於8月12日推出,今次他首度親自作詞,當中內容更與自己的情史有關,而早前拍攝歌曲MV時,他為了上鏡更好睇,竟在連續30小時未有進食的情況下又唱又跳,意志力驚人。

《Burn Out》是借蠟燭形容一段燃燒殆盡的感情,Anson表示:「今次自己作詞,係好personal嘅作品,當中有好多愛情觀同埋歷史想同大家分享。」為了配合歌曲浪漫感覺,MV特意揀了間帶點復古味餐廳取景,Anson更以多個不同造型示人,其中一套西裝更將恤衫開胸至腹部位置,Fit爆身形表露無遺。為了上鏡好睇,Anson特意前一晚開始禁食,加上拍攝超過12小時,足足捱餓30小時又唱又跳,「我只係飲黑豆水撐住生命,但驚喜地唔太辛苦。為咗上鏡嗰一刻夠瘦夠靚,所以即使見到嘢食,譬如工作人員喺我面前食晒薯片,我都忍到冇攞嚟食,所以意志力好緊要。」不過拍到近天光,Anson已又攰又餓,所以完成拍攝要食碗牛腩河才會去睡。

Anson今次MV找來肥仔@ERROR為他排舞外,更厚面皮地主動要求隊友Edan及Jeremy前來探班,不過好兄弟一call即到出心出力幫手,Edan刻意穿上全黑化身PA,在現場幫忙執拾;Jeremy則充當造型師幫手熨衫,令Anson十分感動,講明會請食飯答謝。至於肥仔,他應Anson要求編排舞蹈,更構思埋鏡頭走位,實行幫到盡。被問到Anson舞技如何,肥仔繼續搞笑本色,「我舞技出眾就梗㗎啦!但Anson Lo就係我之上。我老喇!要退位讓賢,要交畀呢啲後生仔去做。」Anson聽罷大嚇一跳,「平時肥仔都唔會咁講嘢,今日咁Humble(謙卑),好驚!」對於肥仔的編舞,Anson大讚,「肥仔創咗一啲我完全未做過嘅舞步,性感不失紳士風範,十分好。」