郭富城老婆方媛(Moka)娃娃臉係靚嘅,就算喺撞樣嘅閨蜜堆入面,都唔輸蝕。但近日Moka就慘被好姊妹所累,話說台灣歌手潘瑋柏日前宣布迎娶26歲「內地最美空姐」兼網紅宣云(Luna),點知城嫂就被扯落水,傳她同潘瑋柏老婆都係由「天王嫂訓練營」掌舵人Amy姐一手打造,由變靚到提供渠道去出擊,培育成「高質美女」去嫁個有錢人,而呢兩個旗下猛將就正好省靚Amy姐招牌。呢個傳聞,隨即惹嚟網上熱話。

 

新婚嘅潘瑋柏透過工作室發聲明,強調網民散佈謠言,使用侮辱、誹謗言論進行惡意人身攻擊,對夫妻二人造成惡劣的社會負面影響。

 

至於天王城城就採取沉默態度面對傳聞,未有回應,就算愛妻方媛33歲生日,兩人都冇喺社交網站高調放閃,而城嫂喺微博貼出生日圖,唔少城城粉絲及好友送上祝福,有網友忍唔住留言追問:「網上傳聞是真的嗎?」方媛竟上載一張圖片回應,而相中寫着:「謠言,遇事冷靜不盲從謠言,自破不用攻。」不過就冇具體解釋網上跟Amy姐及Luna等姊妹合照來源。