去年10月14日「登七」的資深藝人劉松仁最近完成夢想,上周日(12日)剛完成音樂劇《利瑪竇》part 2的8場演出,停工兩年多籌備的心血傑作叫好叫座,唯一美中不足的,就係今次重演的松哥身體狀況已大不如前,要撐住拐杖走路。本報記者追蹤松哥3日,成個人瘦晒的他因為右腳無力要靠拐杖輔助走路,右手長期緊握住拳頭,食指和尾指又不能完全屈曲,疑似中風。記者問松哥的健康狀況,他只輕描淡寫,笑住回應:「係…整親!」對於康復進展?他猶疑說:「希望係康復中啦。」採訪:追蹤組本報收到獨家消息,其實去年4月共12場《利瑪竇》Part 1公演過後,身兼策劃、導演及創作,孭重飛的松哥已「冧」咗。知情人士透露:「數月前松哥嘅狀況更差,見佢參加朋友聚會時強烈手震兼口齒不清,暴瘦到連頭髮都稀疏埋,情況令人擔心!在場朋友都送上關心,猛話介紹好醫生畀佢,不過,佢就婉拒話唔使,話有可信嘅醫生跟進緊,有信心可以康復,不過,康復期較漫長。」據知,松哥除咗跟內地一位高人練氣功外,十多年嚟一直推崇觸感治療法,多年來他更穿針引線,安排該位神醫來港幫人治病,唔少香港闊太及藝人如周潤發、劉青雲夫婦等都經他介紹下接受過治療,每個療程動輒萬元埋單。行動不便仍積極面對
可幸患病後的松哥並冇收埋自己,相反更加積極面對人生,所以他從不考慮將part 2延期。閒時松哥會去西貢散吓步當做運動,就算《利瑪竇》重演,他依然由綵排到正場全部跟到足,睇實演員進度及表現,絕對唔會假手於人,不過,上上落落就有工作人員傍到實。本報記者分別喺1月7日、8日及12日(尾場)了解松哥狀況,1月8日下午,松哥撐住拐杖,獨自慢速行去文化中心場館做準備,見他消瘦了,右膝屈曲能力較差,所以要拖住行,而右手冇乜力,不太郁動,手指都唔多協調。幸好精神爽利,氣色不錯,最難得行住都識笑,面上掛滿笑容,沒有癱臉及歪嘴,70歲松哥仲係好靚仔!而1月8日完騷後,松哥留低咗陣招呼朋友,見他有講有笑,說話好有中氣,唯獨不能有太大動作。之後他由女助手接載返歸,助手細心地為他開車門,協助他孭好背囊,跟住傍住他行返住所。

坦認身體狀況有異樣
至於1月9日尾場開下午二時半,正午12時松哥由中年女士扶住到場,松哥帶點疲累下車,落車後要站穩腳,撐住拐杖先可以舉步,且要由身邊女士扶住前行。對於記者提問,松哥帶點愕然,但有問有答,只不過聽覺和對答反應較慢,要記者重覆問兩次,且說話帶點口震震。問到係咪近來身體狀況唔太好時?他邊行邊笑住說:「係…整親!(係咪康復中呢?)希望康復中啦。(因為之前太操勞而病倒?)唔知喎!(點解唔放假唞吓?係咪暫別幕前休息吓?)放緊假啦!」語畢,松哥不忘反問記者有冇捧場睇Show?仍然風趣幽默。