一眾名模周汶錡、樂基兒及Ana R.等統統升呢幸福媽媽,惜同期的Amanda S.與意大利籍老公Christian Cappelli離婚後,仍在愛情路上兜兜轉轉,雖然7月自爆有新戀情,但至今「神秘男友」仍未曝光。為免又見光死,4字頭的Amanda今次好低調,就算出街都只搵朋友陪。日前晚上,她就同女助手落銅鑼灣買嘢。當日,殘爆的Amanda「烏烏𢱑𢱑」用個「阿婆髮夾」夾住執蔭,行路仲駝晒背咁,好老態!可能男友唔喺身邊心情特別差,其間助手跟她講嘢,她都全程黑口黑面、冇乜反應,咁大殺氣真係好唔Lovable囉!採訪:梁志明Amanda S.的人生好崎嶇。11年,她與拍拖9年的意大利籍老公Christian Cappelli結婚,同年仲喺中環開餅店,以為愛情事業兩得意,豈料婚姻3年貨仔就玩完,好快餅舖亦宣告清盤!雖然火速搭上富豪男友Sam,但對方經營的批發公司前年捲入財務糾紛,涉欠債逾千萬,之後Amanda有冇共患難就不得而知,不過她月前出席活動時就自爆已「換畫」。

黑口黑面
所謂「事出必有因」,當年Amanda承認跟Christian因性格不合,以及生活理念出現分歧而分開,亦有傳因女方專注打理甜品生意,令Christian備受冷落才致離婚。為咗餅舖,早年Amanda壓力大到患上抑鬱,乜都想控制的她後來又跟投資者嚴重分歧,最終辭去董事一職。經常與人「不歡而散」的她,如今再開甜品Pop-up店,火爆性格似乎再次「翻發」!早前晚上7時許,剛收工的Amanda與女助手一同現身銅鑼灣時代廣場,二人步出洗手間後,助手便邊行邊撳住手機撩她吹水,惟Amanda全程面燶燶、雙目充滿殺氣,一副生人勿近咁款。日久失修
落到地面,助手索性遞部手機去Amanda面前,開心Share有趣影片,前者睇到雙眼笑瞇瞇,後者依然木口木面,搞到助手都冇癮收機。其間,Amanda企喺街頭數分鐘都冇人認出,又難怪嘅,昔日索爆名模瘦到「乾爭爭」,一身黑Tee襯白風褸造型更凸顯了「飛機場」身形,加上歲月摧殘,唔知係咪忙住做嘢冇時間保養呢?從露出的半張臉也看到Amanda的膚色明顯暗淡無光。及後去附近藥房買嘢,以黑色「阿婆髮夾」夾住九一分界長瀏海的她,仲駝晒背咁,比起同期做晒索媽嘅名模周汶錡、樂基兒、Ana R.等,Amanda真係跌晒Watt!