青葵公路發生驚險一幕,一輛電單車行駛期間,突然迎面飛來一隻車轆,電單車被撞到左搖右擺,所幸司機最後維持平衡,險過剃頭。司機事後拍片講述大難不死的心情,「今次可能要收山唔揸」。

事發在昨日下午,網上流傳一段車cam片,影到涉事電單車當時正在青葵公路往九龍方向行駛。對面線一輛貨車疑車轆突然飛脫,從遠處沿路直滾,擊中電單車。電單車頓時失去平衡,車身猛烈搖晃一陣後,成功保持平衡,未有釀成意外。

電單車司機驚魂未定,駛至路邊停下後即刻拍片,直嘆「真係大命」。他指對面線當時「飛個轆埋嚟」,令電單車車身擾流板及水箱都有損毀。今次逃過一劫,司機直言「可能要收山唔揸」。

除了該電單車司機,意外亦波及往九龍方向的另一輛私家車,車頭泵把被車轆撞到甩脫,37歲男司機手部受傷,被送院治理。