上月16日「入五」的陳豪(阿Mo)3月為無綫新劇《白色強人II》到內地拍攝,直至周日(2日)才回家。21日酒店隔離加1個月的拍攝時間,搞到阿Mo五十大壽也要透過視像與家人隔空慶祝,一向識做的陳茵媺(Aimee)叫埋奶奶和3個仔女開Live唱生日歌,𠱁到老公係咁甜笑!Hubby不在身邊,Aimee都冇偷懶,萬能阿媽一個湊三個陪食陪讀書陪玩仲要整埋蛋糕開生日會。早前,住南灣的Aimee就湊仔女到淺水灣踩滑板車,年屆40,上圍一向豐滿的陳太仲喺街頭奔走陪玩,幾好睇㗎個畫面!採訪:張詠森
自從結婚生仔後,陳茵媺就淡出幕前專心相夫教子,等老公可以安心出去搏殺,阿Mo亦經常大讚Aimee是好老婆、好媽媽,事關呢位「最強賢內助」除了湊小朋友,連補習老師、傢俬安裝師傅、髮型師都撈埋,連課外活動都安排得相當妥當,每隔兩星期便帶子女到寓所附近行山、游水。早前傍晚5時,Aimee又陪3個寶貝去淺水灣沙灘旁的石屎地玩,7歲大仔陳梓燁(Aiden)和6歲二仔陳浩鋒(Nathan)踩住滑板車周圍轆,5歲「小公主」Camilla唔鍾意踩車車,所以媽咪就同囡囡玩捉依因。
阿媽玩得最開心
上月初踏入四字頭的Aimee體力相當驚人,其間起勢咁跑,避完Camilla又追住「飆車」中的Nathan,之後 Aiden都加入捉媽咪。跑足廿分鐘,做開運動的Aimee都冇喘氣,仲忽然帶頭於鬧市跑去商場,觀乎各人的表情,應該係媽咪玩得最開心,同行的工人姐姐就冇咁好氣,「的」住主子架車仔慢慢行。見囝囝係咁拍部零食販賣機,Aimee即刻帶仔女去便利店買健康的Yogurt頂替,臨走發現《頭條日報》記者在場,她又叫大家向鏡頭Say Goodbye,而搞鬼的Aiden和Nathan更哄埋鏡頭說:「Bye-bye Camera!」另一日下午3時許,Aimee獨自現身THE PULSE行街,剛買完水上用品的她孭住袋戰利品,在童裝店細心揀手袋仔及裙仔,可能想買禮物畀剛5歲生日的囡囡做生日禮物,可惜兜了一圈冇嘢睇啱。