朱慧敏(Queenie)前日(24日)下嫁養和醫院心臟科專科醫生陳良貴(Jason),當初撮合這段姻緣的林盛斌(Bob)就充當「外父」,牽着Queenie進場並交托到Jason手中。婚禮場內照今晨曝光,Bob下午於IG貼出與一對新人的合照,又留言:「點解我鍾意做媒人?因為能夠令到身邊人幸福美滿,自己都會好開心,好快樂。又一對修成正果,恭喜你哋。Jason,Queenie,祝白頭到老,永結同心!」
事後接受傳媒訪問,對於預演嫁女,Bob表示拖住新娘進場時感到榮幸又緊張,他說:「非常戥佢哋開心,一個係我好欣賞嘅女孩子,一個係我認識好筍嘅筍盤,其實佢哋個相遇,雖然係我刻意安排,但係之後條路點行,都係睇佢哋,當然中間我都會關心兩邊嘅情況,講好多正面嘅說話,所以最後佢哋能夠行到呢一步,我真係好開心,佢哋仲要搵我做拖新娘子進場嗰個咁重要嘅角色,我自己都覺得好榮幸,但係又好緊張,你叫我做婚禮MC我就話唔驚啫,呢個咁嚴肅嘅崗位,人生第一次做,有少少騰雞!」
談到把Queenie隻手交給Jason,Bob直言感覺像自己嫁女一樣,他說:「仲有好驚喜嘅係佢哋斟茶畀我,我都真係估唔到,因為佢哋話我係媒人,所以要多謝我,我覺得好搞笑!(向佢哋傳授夫妻相處之道?)我又唔夠膽話教佢哋,因為佢哋都好恩愛,相信佢哋會生活得非常好,衷心希望佢哋幸福快樂,快啲生番幾個好可愛嘅BB,組織自己嘅小家庭!」