肥媽老公Rick月頭因癌病離世,經過一段時間沉澱後,肥媽終於走出喪夫陰霾,生活回復正軌。作為肥媽鐵粉之一的老公,由於「臨行」前曾叮囑肥媽一定要繼續做煮食節目直播,所以肥媽處理好亡夫嘅身後事後,昨晚馬上復工做Easy Cook直播,跟fans互動教煮蒜蓉牛油焗龍蝦尾車厘茄及做薑餅人。身穿湖水藍配橙色圍裙的肥媽化了靚妝,精神奕奕,心情大靚,一開始就同網民打招呼say Hi,而且不時喺節目中大笑,仲興之所至,開埋腔高唱勵志歌《個個都做得到》及開心歌《Beautiful Sunday》,網民不時留言叫她加油,大讚她好堅強,唱得非常動聽。

 

老公離逝早上見白鶴

節目中肥媽不忘多謝網民打氣,還自爆老公多次返來「見」她,所以唔覺老公走咗。她說:「我𠵱家好開心,Easy Cook做得咁成功要掌聲鼓勵。喺呢段時間多謝所有fans關心我,大家一齊集氣令我個人都好容易應付到每一件事,幫到我好多。我先生走得好安詳,佢離開嗰朝,一早喺窗口見到白鶴,我心諗『唔係海邊先有白鶴咩?』食完早餐佢因為透唔到氣就送咗入院,佢喺醫院同個細仔視像完,又同最錫嘅孫女講完電話,之後話見到好多angel(天使),半日之內就走咗,真係好修得到。」返嚟咬咗一大嚿麵包

「我當然好掛住我老公啦!我日日同佢傾偈,冇當佢唔喺度。我老公都好掛住我,佢成日返嚟搵我,係真㗎!唔係導人迷信呀!我聽人講,有擺佢生前最鍾意食嘅嘢喺屋企,佢好鍾意食搽咗牛油及果醬嘅黃糖提子包及飯,佢好曳,返嚟咬咗一大嚿麵包,而『三七』時,佢明顯食晒筷子隔離啲飯,筷子上仲黐住兩粒飯喺度,麵包都有咬過,但唔係畀老鼠食,因為枱面啲嘢冇凌亂,蛋糕依然喺度。而每晚凌晨三點幾,屋企六隻狗狗會向住佢書房吠同擺尾。今晚開live,都有隻飛蛾伏喺門口,前幾日我個仔喺西貢住所都見有飛蛾伏咗一晚唔肯走。」

家人喺身邊定要珍惜

肥媽坦言老公離逝初期真係好辛苦,𠵱家諗通咗:「佢臨走前好似預知咁,喺廁所加建扶手,最初以為佢為自己而設,點知我呢兩日真係整親腳,要扶住先去到廁所,佢好似仲喺我身邊咁,永遠活喺我心中,只要心中有佢,佢永遠就喺你身邊,永遠喺度陪緊你,所以唔使驚。」她對住鏡頭跟亡夫說:「老公!我有做呀(直播),我做嘅嘢做晒喇!」目前兩個仔搬返肥媽家住,細佬又成日嚟陪她,給她有強烈家庭感覺,肥媽有感而發說:「𠵱家疫情好緊張,希望大家都多啲留喺屋企食飯,多啲同家人聚吓,原來一世人流流長,其實只係得幾十年,幾十年有幾長呀?家人喺身邊一定要珍惜。」