張惠雅(Regen)早在18年已在大角咀開了飛機主題餐廳,今年本計劃再做老闆在同區再多開一間食肆,但因疫情被迫煞停,就連她去美國參加「PCT」(即太平洋屋脊步道),打算行足半年山的大計亦只好放棄。不過,她緣份卻遇上長洲吉舖出租,趁住這段完全不可有計劃的日子,開間私竇式餐廳,自娛之外亦成為朋友和粉絲的聚腳地,用這個空間齊齊玩吓放鬆吓!採訪:杜淑霞、何智翹

Regen兩年前落足心機搞飛機主題餐廳「The Galley by Cafe Proud Wings」,但今次開舖反而是無心插柳,「本身開咗飛機餐廳,諗住隔離再開多間,但係等咗成年都搞唔到,而本嚟4月去行『PCT』,但係因為疫情都唔係好敢去美國,變咗呢半年都唔知做乜好,好似大家咁啲計劃煞停晒,咁啱有朋友問我租唔租呢個位做生意,啱啱我都想搵個好寧靜嘅地方可以傾吓偈,做自己想做嘅嘢,係一個完全冇框框嘅地方,鍾意做乜就做乜,冇乜規矩,畀人放鬆嘅地方。」

Live show蝦碌連場

餐廳由Regen一手一腳打理,更會親自做埋大廚,但由於籌備時間不足,暫時仲未有菜單,「我完全預計唔到10月接咗個job主持節目,呢個節目花嘅時間都好長,自己又出新歌(《自由流浪》),本嚟有空檔去準備間舖,𠵱家變咗冇時間準備好急趕,舖頭雖然未係好ready,但係好開心朋友同fans留言『唔緊要㗎!有個地方畀佢哋聽我唱歌就夠!』呢度好似畀我跳出一個制度,或者自己開個遊戲出嚟,試吓自己有個地方做自己鍾意做嘅嘢,唱歌呀!真係想冇壓力之下或者束縛之下,去做自己鍾意做嘅嘢。(暫時冇菜單?)大家鍾意食啲咩,我盡量可以煮畀大家,我個人對味覺、嗅覺都係比較敏感嘅,可以煮到畀大家試吓,好似
Omakase(廚師發辦)咁,哈哈!」

日前Regen已經首次在餐廳舉行Live show,邀請朋友和Fans出席,有得食嘢兼聽歌,不過當日發生不少蝦碌情況,「我個人不嬲都蝦碌嘅,嚟得嘅人都知道我不嬲蝦碌開,所以我覺得大家會接受到我啲奇怪嘢,好似load極都load唔到啲音樂,4點開始4點半先唱到一兩首歌,大家都好開心照樣喺度。」Regen預告,除了搞Live show,更打算搞埋Movie night同fans齊齊欣賞電影,仲會籌辦好多不同類型的Workshop,譬如:學沖咖啡、學調酒、wine品酒會及學換電話mon等。