26歲女團BINGO成員卡文(Carman、關嘉敏),最近參加《全民造星III》而人氣急升,她坦承參賽為提升知名度,證明自己實力,仲話希望30歲前做到成績,但不限於做歌手,更想向全能藝人進發,「我會keep住繼續跳舞唱歌嘅,但係我自己想向演員進發先,因為作為演員如果識跳舞唱歌會加分,但係你係一個跳唱組合你唔識演戲,即係作為一個藝人你做唔到全能。我都想向電影方面發展嘅,希望做到演員啦!我希望30歲嘅前,可以參與幾部嘅電影,其中一套係女主角我已經好開心。」

講到奮鬥目標,卡文首選已蜚聲國際的動作女星楊紫瓊,「我有跟冼灝英師父學功夫,雖然我阿媽唔係太鍾意我打功夫,因為成日整到周身傷晒,同埋怕會好粗魯冇男仔鍾意,嚇走晒啲男仔!成日都叫我唔好打,但係我覺得楊紫瓊就係散發出另外一種女性嘅魅力,就係因為武打,我做演員都係想向武打方面發展,因為我知道香港比較少出武打女星,上一個可能就係楊柳青,我都想做新一代嘅打女!」

至於卡文早前演出KB(李健宏)的網上靈探節目《又要睇又要驚》,當中強姦戲有性感演出,更被對方封為「新一代鬼后」,她就認為不介意重口味的性感演出,但不能接受露點,「首先要睇吓咩演出同埋咩故仔,對於畀人強姦咁重口味嘅性感,我覺得係OK嘅,好少演員可以接觸到強姦戲。不過,露點就唔得,但露背都OK嘅,pat pat就唔好啦!意識上大膽可以嘅,我比較鍾意啲重口味嘅嘢,所以我都想再試吓啲變態啲,或者血腥啲恐佈啲都可以。」卡文更笑言幾鍾意「鬼后」這個稱號,「畀KB講講吓,都覺得自己有幾分似鬼嘅,咁就唔嘥咗,況且鬼通常都係靚,鬼火咁靚嘛!」