受疫情反覆影響,C AllStar On仔(陳健安)單飛後處男個唱《陳健安2020以青春之名演唱會》由今年2月28日改到9月18日仍然開唔成,最終落實喺11月1至7日轉做網上演出。作為本土網上個唱開荒牛嘅On仔保證,網上演出唔會小規模過實體演唱會。採訪:方騫平 場地:香港海洋公園萬豪酒店

今次《陳健安2020以青春之名演唱會》經歷兩次延期,從氣餒到積極籌備,On仔經已疊埋心水唔再去諗,問到做唔成實體演唱會係咪有啲美中不足?On仔:「我只係有一種想法,首個個唱要去到盡,有啲All in one心態,事實上唔知疫情幾時完,一年後都未必做得到實體演唱會,網上演出可能係一個出頭天,其實要自己救自己,讓香港觀眾漸漸接受網上演出要收費,而今次掌握到嘅技術,將來都可以用返落實體演唱會中,今次我哋好大規模,會唱成30首歌,仲book咗一個廠,由專人嚟設計演出場地。不過,最初做係會有啲壓力,𠵱家有晒方向成個團隊好有信心,反而好Enjoy。」

設數碼座位增互動
今次網上演唱會包裝成一連7日《本原祭》招待本原族(On仔歌迷),除On仔外,還會同喜愛單位,如雞蛋蒸肉餅、TheHertz、雷同二友、Greytone的Keni、NovelFriday,還有一位做影像的Tezzz Crossover,一起Jam歌,不過就冇預C AllStar 3兄弟:「畀佢哋唞唞啦,留待合體時再演出,今次係我個唱,成個Rundown有好多自己想唱嘅歌,不過,佢哋經已喺我心入面,我聲音、靈魂入面都有佢哋喺度,永遠搣唔甩,化灰都睇到!」雖然冇預演出,但三子會做座上客,「疫情下大家都冇乜嘢做,佢哋唔會唔睇呀?今次我哋設計咗一批數碼座位,我可以同呢班觀眾互動,不如叫佢哋『上座』,我唔除衫,由佢哋除,其實都幾有趣喎!」