自從「富豪船P」羅生門事件後,江嘉敏和馮盈盈便由「打卡之友」降呢「過氣閨密」,兩人更開始各自另覓「飯腳」,如本周日盈盈就約麥明詩擦蟹,而江嘉敏早於8月中已轉黐「楷女郎」郭嘉文及富家女鄺潔楹。除了埋有錢人堆,近日她又跟一線姐仔高海寧(高Ling)忽然老友,早前《頭條日報》記者就見到兩人去又一城食Tea,邊食邊交換化妝心得又孖住去買化妝品,不過呢段關係明顯有「階級」之分,平日大大聲好多嘢講的江嘉敏,面對高Ling即變得「鵪鶉」,全程企喺不出2米範圍內Standby陪逛、畀意見,唔知以為係助手!採訪:譚壹致
雖然合作過無綫劇《殺手》及《七公主》,但完全唔覺江嘉敏和高海寧私下有交流,就算喺IG搵張二人合照都難,估唔到近日兩人卻發展出「長短腳友誼」,日前仲一齊去又一城撐枱腳。

走樣嘉敏
當日下午3時許,雖然只係落街食個下午茶,但貪靚的高Ling都戴晒帽、襯晒一Set韓風西裝Look,星味濃到途人都忍唔住𥄫兩吓!反觀身高165cm的江嘉敏,着住件橙紅色連身短褲襯白波鞋,同隔離屋妹仔冇太大分別;可能自知比較矮,為幫自己駁高啲,江嘉敏都刻意紮番個「道姑頭」,同172cm的高Ling拉近啲啲距離。其間,兩人在餐廳內哄到勁埋研究眼妝,記者Zoom近啲睇,發現素顏的江嘉敏眉短短、面腫腫,同鏡頭前甜美可人完全兩個樣,「易容術」咁高超,難怪高Ling都要請教她!
全程死跟
食飽後,兩人戴番口罩便到樓下LOG-ON買嘢,高Ling主力睇日牌面膜、眼線筆、染髮劑等,江嘉敏就一路長伴左右陪Shopping,最終高Ling拎咗幾包浴鹽去埋單。在排隊畀錢時,江嘉敏睇中一個粉紅色的迷你座枱電風扇,正當她興高采烈打算Show畀高Ling睇時,一向行成熟性感路線的高Ling卻唔多識欣賞,口噏噏直指唔靚,被潑冷水的江嘉敏即由「腰果眼」變「阿愁」,轉身將風扇擺番原位。隨後兩人轉往化妝品牌專門店,高Ling將唇膏、粉底逐樣拎上手研究,不過玩完一輪冇幫襯,最後全程好好「服侍」的江嘉敏陪對方等Lift,之後再獨自會合男友坐車離開。