邵仲衡(大佬孝)最近在ViuTV新劇《暖男爸爸》飾演張可頤(Maggie)前夫「Roger」,他形容角色既是狂人,亦是個浪漫男人。談到首度跟Maggie合作,他興奮跟「女神」拍咀嘴戲,大呼好滿足。講到現實與圈外太太Wendy結婚19年,兩個囝囝已分別18及16歲,能夠維繫好家庭關係,大佬孝自有一套冧妻三大守則。採訪:杜淑霞 攝影:李維隆 場地:富衛1881公館

首度跟Maggie合作,作為前輩的大佬孝竟化身小粉絲,「以前喺國內睇香港演員寧舍有親切感,梗係有某程度上仰慕,作為小fans觀眾嘅心態,但係做呢行就有呢樣好,下個戲就做一pair,日日對住。好多人好羡慕我同Maggie合作,尤其係我呢個年紀嘅朋友。」劇中大佬孝跟Maggie演過氣夫妻仲有親密戲,令他格外興奮,「真係勁咀嗰場冇咗,但係後尾都有啲地方短兵相接,但係我都好滿足㗎啦!哈哈!」

大佬孝01年跟從事地產行業的Wendy結婚,對於令關係保鮮,他認為有三大守則,「第一,唔好成日侵入對方領土;第二,就係搵啲生活小趣味,第三,唔好吓吓問到底要識得留白。」他坦言這是經驗之談,「老人家教兩公婆嘅嘢,隻眼開隻眼閉,一定要畀對方空間,有啲嘢唔想講唔好問,你有啲嘢唔想講都唔鍾意人問啦!另外,話長話短說直接啲,但有啲位反而唔可以咁直接,或者用其他方式,因為佢唔係街外人,或者工作上嘅朋友,佢係你太太,你要嘥多少少時間諗吓究竟用咩方式表達你嗰個『No』字。」至於生活小趣味,大佬孝以往愛帶老婆去特別地方旅行,但因疫情他轉為煮愛心餐,「自己都肚餓㗎!哈哈!(煮西餐定中餐多?)乜都有嘅,我自己鍾意啲唔使太多功夫嘅,之前鍾意煲湯嗰啲,但𠵱家會傾向整日本同韓國菜,因為調味料比較特別,幾得意。」至於對待兩個在英國讀書的囝囝,大佬孝否認是「暖男爸爸」,但會比較開明不會太緊張成績,平日仲會跟囝囝傾英超和講音樂,「我覺得父母安排佢去間幾好嘅學校已經夠,我喺側邊提點吓,你考得好唔好唔關我事,你自己冇面啫嘛!」