難得放假,一眾星爸盡情享受天倫樂,好似蘇永康(蘇康)今日就帶囝囝蘇展弘(Jazz)去酒店Staycation,仲拍晒片放上IG開心Share,他留言:「Jazz終於可以Staycation,仲有佢最鍾意嘅水上活動,又可以同表妹一齊玩。今日玩到黃昏都仲未攰,今晚我諗食完飯就瞓到隻豬仔咁啦 @i_am_jazzso #staycation #thankful #sunnyday #holiday #funny #但願我能給你一個更像天堂的地方」片中,一身潮Look戴晒黑超的Jazz,好叻仔地自己拖住個車仔造型篋帶隊上房,老竇就全程緊隨其後𥄫實阿仔;另外兩段片,就睇到Jazz同表妹一齊喺泳池玩水,之後兩人又返房一齊食曲奇餅,喺Cute爆表妹面前,Jazz都即刻Chok晒Pose影相,似足老竇喎!至於杜德偉(Alex)兩父子今日就一齊落街買餸,Alex咬緊牙關左手抽住啲水果,右手就抱起肥嘟嘟的囝囝AJ,太太老婆李曉冰(Ice)於IG貼圖並留言:「健身使乜擇日 @alexto_dudewei #AJ淪為健身器材表示無奈 #自殺式買餸 #右手攞多包米先平衡 #偉大父親系列 #強勁臂彎 #AJTo」睇番相中AJ的表情,只能說一臉無奈,兩父子表情相映成趣,好搞笑!