羅仲謙(謙仔)自從升呢老竇後,為了愛妻楊怡和寶貝女「小珍珠」,劇接劇努力狂賺奶粉錢。剛拍竣新劇《陀槍師姐2020》,最近他又夥鍾嘉欣、鄭嘉穎和馬國明等趕拍《兒科醫生》,同時主演的劇集《木棘証人》亦正熱播中,難得今日不用開工及宣傳,謙仔即留在家中充當湊仔公。錫到個女燶的他於社交網貼出冧抱「前世情人」的照片,並留言:「今日放假,邊度都唔去留喺屋企湊女,大家有無緊貼木棘証人呢?聽講劇集口碑都不錯,多謝大家支持。」相中,穿黑色背心的謙仔大騷麒麟臂,仲一臉幸福滿足地望住囡囡,盡顯父愛;而小珍珠就眼仔碌碌望住鏡頭,手腳儼如蓮藕一樣肥嘟嘟、一截截,非常可愛!一眾圈中好友及網民紛紛留言讚Cute,同樣是新手爸的陳山聰留言:「me too.」洪永城則搞笑問謙仔:「你個手臂有冇BB嘅兩倍size?」至於跟湯洛雯(靚湯)蜜運中的馬國明讚Sweet,豈料引來網友催生BB:「你都快啲同靚湯生番個。」