「劫後餘生,多一種愛在心」。

  周柏豪在人生中遇上低谷,情緒飽受困擾,令他步出陰霾,重新堅強振作,正是囡囡周芯悅(Sonya),「係個女拯救咗我」!

撰文∣林子棠 攝影∣譚志光

周柏豪最近推出新歌《劫後餘生》,他曾形容新歌面世的一刻,情緒崩潰,甚至飲泣;原來這首歌不單止是柏豪相隔近兩年再度出歌,更在這段時間遇上了兩個極大的人生轉捩點。

「病困趕不走善良,落泊中寫驚世樂章。」

  「這首歌係記錄我在一段頗長時間處於崩緊和恐慌的狀態中,情緒一直有狀況,因那段時間經歷了好多的高低、跌倒、站起、再跌倒,百般滋味在心頭。現在渡過了,叫做能夠企番起身,再做一個應有的周柏豪,希望藉以鼓勵跟我一樣,在人生道路碰上困難的人,能樂觀堅強面對;謹記只要有愛我們的人在身邊,可以攬着他們,種種事情都會過去,不用再驚。

「假使現實殘忍,牽手背道狂奔。」

  「當時發生咗好多事令情緒困擾,有工作上的挫折、疫症、更有多位朋友和家人身體不適及離開;加上社會運動令各行各業受影響,原本做得開開心心的幕前工作突然變真空,進入了無法預知的未來。還有網上受到的抨擊,令我不懂適應新的社交媒體模式,事關講一句說話、貼一張相,都會引起好大迴響,好似企又被鬧、坐又被鬧、瞓低又鬧、出現又鬧、唔出現都畀人鬧!那段時間好恐慌,做任何事都有負面聲音,講到要毁滅我、對付我……,就算我點堅強,但我始終係一個有感受的人,都會驚,唔知點算,會想到出街會唔會有危險?屋企人出街又會唔會有危險?之後會點?愈想愈多,甚至乎不懂表達自己,唯有自己消失,湊巧那段時間太太有BB,索性留家照顧太太,算係人生幾大的轉捩點。

「有你在懷內,知天光已極近。」

  「直至囡囡出世成為另一個轉捩點,突然發覺只要有屋企人、尤其有太太和個女,所有事都不用再擔心,現在任何事都會以囡囡出發,反而處於非常舒服和放心的狀態,因為想擁有的已擁有了,最重要係一直努力給囡囡有個適合環境成長。囡囡的出世,成為了拯救爸爸的一個天使,因為有了責任,我務必要給她最好,包括最好的爸爸、最好的自己,才可以教會她堅強,所以係囡囡拯救咗我!最近我看到一篇文章感受好深,小時候係由爸爸帶個女去看世界,但其實個女嘅成長和小宇宙才是爸爸的未來和全世界,所以我唔會再消極,只會向更堅強、更好的將來進發。
「抱住至親,管他海嘯地震。」

  「通常我把家人放幕後,再用夾萬鎖住,而新歌MV會突然讓囡囡出鏡,因MV導演想表達究竟一個災難或劫後,餘下來的生命會如何?除了我們,我們的下一代和後代其實都係餘生,因此想用BB代表小生命,便提議想搵囡囡。一開始我都有抗拒,導演話剩係手腳意識形態和側面,影唔到樣;既然在保護到囡囡的情況下,對我而言亦是個好的記錄,因歌曲講述我自己怎樣從劫後重新站起,如果用自己個女,成件事就完整好多,她長大後睇到,亦知道爸爸原來因為擁有她而變得更堅強。我亦好鍾意囡囡在爸爸身上好舒服好有安全感下瞓着的一幕;而今次仲係俾咗兩粒餅仔、重金禮聘囡囡出鏡㗎。」

  當上幸福人爸,柏豪已預計自己將會是麻辣外父;「個女20歲先可以識男仔!我真係有想過將來個女被男仔追會點,特別係有啲衰朋友成日嚇我,話有咁多女粉絲鍾意我,現在自己有個女,點都要『還』;但無計,小朋友都係要成長,所以談戀愛無問題,但要戴眼識人,同埋要俾爸爸我望一望……。不過諗起都大件事,唔知點算,我應該係麻辣外父果類!」

  雖然有女萬事足,但柏豪表示萬事以太太Stephanie為大!「太太要照顧BB,所以我一定會先顧及太太的感受;我仲試過呷個女醋,同太太講,『你依家剩係攬住個女喇』!(好耐無俾太太攬過?)咁又唔係,但我一向嚮屋企都係做慣主角、有射燈射住,突然變配角,難免有啲難受,不過我絕對甘心!依家屋企只有太太一個主角,個女都暫時係配角,因為仲未識聽,哈哈!」