大家今年點過中秋節呢?陳倩揚就用一個好特別方式嚟過節喇。

陳倩揚自創食得飽,冇壓力減肥方法紅遍網絡,她常以「過來人」身份分享低醣飲食餐單及生活,Facebook專頁已吸納約8萬6粉絲支持,而《你得我得行動組》減肥團激增至7萬5成員加入。為咗鼓勵團友,陳倩揚經常跟成員互動,繼之前為咗表揚學員Karly減肥成果,特別安排對方影婚紗相外,昨晚喺迎月夜,倩揚又搞新意思,同車行合作,由老公充當司機,駕車去港、九、新界即興送禮物,同網友玩互動。

當晚停雨後,兩公婆開始行動,由迎月夜玩到中秋節凌晨兩時多,由銅鑼灣出發先去太古城,再行東隧及大隧到各區,駕車途中倩揚更開腔唱吓歌仔《春夏秋冬》及《月亮代表我的心》助慶,陳生更搞鬼地亂入歌詞,𠱁到倩揚笑得好開心,兩公婆又齊齊食月餅,寓工作於娛樂,sweet爆。

由於首次以咁嘅形式做直播,倩揚顯得相當興奮,大叫好玩。陳倩揚接受頭條娛樂訪問時話,今次中秋迎月即興送禮live有2千幾人睇,玩到凌晨兩點仲有成千人收看,有差唔多一萬個留言,其實今次相當刺激,本來以為黑雨活動要取消,直至等到黃雨過後即時行動。見於反應好,考慮擇日重賽。