44歲歌手小肥(徐智勇)日前接受陳志雲的YouTube Channel節目《Stephen.傾》訪問時,突然自爆「同志」身份!該節目於昨晚播出,小肥坦言:「縱使你知道(自己嘅性取向),你都唔敢去認,甚至覺得自己都討厭,自己都唔想,但冇辦法,呢啲嘢阻唔到,嗰28年都對住啲Friend扮嘢囉,哈哈!」提到過去只有兩位同性密友,被問到第一次跟男性拍拖是何時?小肥說:「入行後,大約2005、2006年,係圈外人,一齊咗3年;之後一個就10年,直至18年就散,嗰次好Hurt,因為佢成日要返內地做嘢,一個禮拜先返嚟兩日,我仲專登作首歌《你明日回來》,將每個禮拜五都期盼佢喺內地返嚟,點知唱完呢隻歌就分手。」又笑言第一次送首任男友回家時,曾被傳媒拍得他打對方Pat pat。

至於如何認識同性朋友,小肥表示會到基吧認識朋友,也會透過朋友介紹,自己好信緣份,亦明白急唔嚟。那麼父母可知道其性取向?他說:「唔知,媽媽而家開始腦退化,家姐就知知哋,因為之前嗰位都有同我返屋企,當佢係親人一樣。」此外,好友藍奕邦也在IG Story留言,重提與盧凱彤創作、小肥主唱的歌曲《內外》,並謂:「恭喜你,終於由『內』走到『外』!送番你自己隻歌俾你賀吓你,而家聽番係咪應該另一種心情呢?我好為你驕傲,相信阿妹(盧凱彤)都一定係!#呢首歌就係講出櫃這回事」對此,小肥回覆:「真係……由內轉外,多謝邦邦同阿妹,帶我走出呢一步」、「但真係因為呢隻歌,我先作出咗要對自己坦白嘅承諾。」