葉晴晴(Robynn)自Robynn&Kendy休團後,在音樂上沒有停下腳步,繼英文歌《Lost Forever》再推出英文新作《Fifth of May》,6月宣佈陀B的她,頂着大肚仍密密出歌,她解釋既要安撫一眾未能接受休團消息的粉絲,也因新歌正是送給已故母親的禮物,回覆母親一封未寄給她的信,對於即將為人母的她在這個時間演繹,別具意義。採訪:杜淑霞 攝影:Catcha Studio

新歌《Fifth of May》的靈感來自Robynn病逝的母親,「媽咪喺我出道嗰年年初離開,之後每年佢生忌5月5號我都會返舊屋,睇吓佢啲遺物懷念吓佢,有年就發現咗一封佢冇寄到畀我嘅信,當時我應該啱啱去咗美國讀書,佢話好引以自豪我同家姐都可以考到大學,因為佢冇機會讀到大學,覺得自己英文唔叻,呢首歌就好似回信畀佢咁,話佢聽我依家過得好好,亦希望將呢首歌送畀世界上所有母親。」

睇B狀況出歌將為人母的Robynn坦言演繹上也受影響,「本來我寫歌嘅時候係未有BB,到錄音時知道有咗,感受真係會有唔同,歌詞都有少少調整,好彩錄音時自己忍到冇爆喊,但係好感動。」Robynn自爆陀B頭3個月日日攬住個馬桶做人,但堅持出歌,除了想送禮物給母親外,更想答謝粉絲,「點解咁急做歌,係宣佈休團之後,好多fans覺得好突然好唔開心,我想話畀佢哋聽我唔會放棄音樂,本嚟諗住做完今年啲歌先專心生B,點知BB比預期早咗出現,最初都擔心做唔到歌住,因為初頭真係不停嘔,日日攬住個馬桶好辛苦,但係踏入4個月就穩定好多,趁嗰陣時個肚冇咁大就即係去拍埋兩首歌嘅MV。」預產期是年底的她,還希望趕時間多推出一首歌,「我好享受依家全部嘢可以自己控制,始終組合會有啲限制,之前自己寫咗好多歌,都想快啲畀到大家聽,不過要睇吓BB狀況先決定到。」