伍詠薇(伍姑娘)出名喜愛夜蒲,圈中大小Party都總見其蹤影,且次次都不醉無歸。不過,近年她甚少出席公眾場合,尤其去年7月跟老公練海棠遊日慶祝結婚20周年後,連月來,伍姑娘頻頻於社交網自爆失眠,仲一個人出走散心。可能跟社會運動持續8個月加上再爆發武漢肺炎有關,導致工作量驟減,本來她都諗住2月生日「重出江湖」開P慶祝,惜早前忽然患腸胃炎,仲痛到要老公練海棠陪睇醫生,而接拍嘅內地劇都要Hold住,難怪伍姑娘冇晒心情!採訪:張詠森
早前香港電影工作者總會會長田雞直言,8成電影從業員已經接近半年冇工開。香港娛樂圈史無前例受重創,藝人的工作量亦大大下降,好似久未露面的伍詠薇,唔計11月出席契細佬陳山聰的婚禮,最近一次亮相公開活動,已經是10月底為配音的電影《愛登士家庭》宣傳,而過去一年,除了獲好友蔡一傑邀請,遠赴加拿大多倫多擔任演唱會嘉賓外,似乎就只有演出ViuTV新劇《歎息橋》,以及得閒上吓綜藝節目、電影首映等。

老公常伴左右
眼見社會一片愁雲慘霧, 伍姑娘都索性將自己「摺」埋,連月來不單止絕跡社交場合,還數度於社交網自爆失眠,體重更跌至49KG!做了大半年「獨孤精」,本來上月去完「一個人的旅行」後,都諗住注滿能量重新出發,殊不知回港後患上腸胃炎,痛到伍姑娘稱:「懷疑自己順產生仔都忍到痛。」卒之早前還是頂唔順,在老公練海棠與助手陪同下到中環睇醫生!
當日下午3時許,練海棠戴住個N95口罩,傍實由頭到腳包到冚的太太去診所,逗留約1小時,夫婦倆在助手陪同下落樓,練海棠一臉憂心忡忡,至於伍姑娘,雖然戴晒口罩同眼鏡,但見她不時翹住老公,感覺相當虛弱。之後助手先行離開,二人便步行往西環方向,其間經過一間麵包舖,可能諗住食包清淡啲啦,但歎慣正嘢的伍姑娘始終揀唔啱,最後他們走去附近一間雲吞麵舖買外賣,回程時再於銀行撳埋錢,便雙雙登上座駕離開。

工作飯局叫停
病癒後,伍姑娘即於社交網出Po宣佈:「今年不想宅下去,大個女要重出江湖。沉睡接近三年靠意志力自我醫好棘手都市病。」仲話2月生日想來一個溫馨愉快飯局,又自嘲「好唔客氣」地問有冇人送這份生日禮物給她,並語帶相關寫道:「真心想睇吓仲有幾多篩剩嘅朋友真心愛錫我。」可惜事與願違,武漢肺炎疫情日趨嚴峻,全港市民都「閉關」以免外出感染病毒,伍姑娘不單止生日P要擱置,據悉原定稍後仲要北上拍內地劇,惟內地影視製作近乎全面煞停,睇嚟伍姑娘都要「宅下去」嘞。