日前鄭俊弘(Fred)與何雁詩(Stephanie)齊接受TVB娛樂新聞台節目《StarTalk》訪問,大談元旦宣布訂婚感受。Fred表示希望有一個好回憶留給Stephanie和自己,所以決定旅行時求婚,他說:「求婚仲緊張過自己第一次開演唱會,成個人震晒同硬晒!而最初亦好擔心過關時如果Check行李,俾Step見到隻戒指就穿煲,好彩順利過關。」專訪中,Stephanie大爆為Fred學煮中餐,她說:「以前我煮西餐多,因為知Fred鍾意食中餐,所以特登研究,另外我哋兩個都好鍾意食越南河粉,我哋去美國可以餐餐食越南河粉,所以返到香港就去硏究點整個湯底,希望可以食返個味道,我哋誇張到一早七點去街市買牛骨同牛腩。」

兩人決定年尾於美加地區酒莊舉行婚禮,「一切從簡,唔會好多圍數,同家人朋友分享,我哋好怕婚禮要表演同唱歌,想好好享受我哋嘅大日子,而唔係要搞到好攰,唔想去應酬邊個應酬嗰個。」