星島新聞集團舉辦80周年晚宴暨「2018年傑出領袖選舉頒獎典禮」,星島新聞集團主席何柱國致辭時表示,看見擔任頒獎嘉賓的特首林鄭月娥忙於講解很多事情,包括《逃犯條例》修訂,認為特首聽從了好多商界意見,抽走了很多罪行,相信商界會好歡迎政府的決定。

何柱國續說,今日工商界對條例反應、意見咁大,其實在內地做生意的人好不容易,「成功嘅係經過好多打出嚟嘅,因為裏面(內地)的政制和法治水平同香港唔同」。他又指,有幾個朋友和他說,「今次嚟埋(晚宴),下次都唔知有冇機會嚟,可能被人拉咗入去坐監都講唔定,你知啦我哋喺大陸梗踩過界、踩地雷,唔係搵唔到食。」他相信保安局局長李家超應該明白這情況,希望他想辦法消除商界的憂慮。

他提到,香港的成功全靠普通法,如果條例是與普通法國家接洽,商人好安樂,亦好樂意接受,但當兩地有不同法治制度時,便要「諗得好清楚」,「好似台灣話唔收貨,要推旅遊警示,呢個唔係幾妥喎,你話同佢傾過,點解會咁樣呢?」
他強調,香港最緊要的是一國兩制,而一國兩制最重要的就是普通法,所以做任何考慮時不要衝擊普通法,讓香港有一個好的營商環境,「以前啲人話喺大陸做生意,一返香港就成身鬆晒,如沐春風,希望佢哋將來都繼續咁樣,返嚟香港如沐春風咁樣。」

何柱國表示,政務司司長張建宗指香港要尊重一國,國家安全很重要,反問「如果國家安全重要,點解唔行二十三條先,要行四十六條(罪行)呢?」,又指已經幫政府計過票,現時推行二十三條立法絕對夠票,何時推行便要政府「自己諗」。