胡鴻鈞笑認與馬明有火花,希望網友起哄二人「在一起」;馬明亦想跟他拍HeHe電影。
胡鴻鈞笑認與馬明有火花,希望網友起哄二人「在一起」;馬明亦想跟他拍HeHe電影。

  (星島日報報道)馬國明與胡鴻鈞(Hubert)因合作《降魔的》而成為好友,及至《降魔的2.0》令友誼昇華,早前更被拍得「孖公仔」去睇靚車,二人直認已成為無所不談的老友,更互爆對方秘密,包括Nice爆馬明的「黑面實錄」,以及Hubert的「HeHe之謎」,保證笑到有腹肌!

  由馬國明及胡鴻鈞(Hubert)主演的《降魔的》載譽歸來,二人不擔心《降魔的2.0》狗尾續貂,皆因編審早已預計拍成三部曲,並非為開而開的續集,第二輯亦會清楚交代馬季找不到豪仔的原因。Hubert則大呻「豪仔」依然冇女埋身:「我與鄧佩儀的嘴戲都是有原因及功能性,偏偏我本人比較膚淺,希望拍有愛情感覺的『實質』嘴戲。」馬明即笑說:「大家都是嘴戲,不要分哪麼細,下次跟監製爭取一下。」

  問到靈異劇種會否分外「惹鬼」?馬明坦言入行多年從未撞鬼,就算出名猛鬼的男藝員休息室,他照樣可以大覺瞓;Hubert則說:「細個時試過瞓覺冇啦啦聽到木屐聲,朝住我行過來後,更有阿伯的咳聲,嚇得我全身發涼,所以我從來不看鬼片,貼錢買難受,哈哈!」馬明卻唱反調指最愛睇刺激鬼片,卻最怕「小強」,「如果出Trip見到酒店房有曱甴,一定要換房。全家得阿媽唔驚曱甴,可以徒手捉,我就算『執屍』也要包大叠厚紙巾才敢掂,飛曱甴更加搞唔掂,恐怖過鬼!」除了曱甴外,馬明最怕「高頻女生」:「說話高音又多話的女生我都驚,好彩劉佩玥(Moon)對住我時不算煩,可能Chur其他人啦!」Hubert即說:「Moon就快搞到我『職業性失聰』,長期嘈喧巴閉到我耳鳴,耳膜都快要穿了!」

  馬明表示與Hubert同樣愛睇波及靚車,加上互相信任才無所不談,更揚言想合拍如《叔.叔》等同志題材電影,嘗試現實中不可能的事。他說:「我見Hubert乜都肯講,我又卸下心防談天,這一行很難找真心朋友,我們會交換秘密,連感情事也講,就當互捉痛腳,哈哈!」Hubert即笑言二人隨時「攬炒」:「我知道馬明保持身形的秘密,就是晚上6時後不吃澱粉質,所以他從來不吃消夜。」

  馬明隨即反爆料說:「我也曾以為胡鴻鈞是HeHe,當他第一次跟我傾女仔時,我心諗:『咦,乜佢唔係Gay㗎咩?』但很快便知道他喜歡女生,哈哈!(有否跟你傾蔡思貝?)總之他未覆記者前就有覆我囉,只是答法跟答傳媒一樣,哈哈!(覺得他重色輕友?)不是喎,他約我多過約女仔!」愈講愈開心的馬明又自爆「黑面實錄」:「我最不喜歡代客泊車,不想別人掂我部車及坐司機位,就算去餐廳也要求自己泊番,如果要『被代泊』會黑面囉!」

  《降魔的2.0》寄語大家放下執念向前看,拍攝時正經歷「安心事件」的馬明,不諱言早已Move On:「那時候正想自己靜一靜,開工反而為我提供了獨處空間,專心演戲。其實所有人都要Move On啦,很多朋友說介紹女仔給我,但暫時得個講字,若是相睇那種形式太尷尬了,不會去;但不介意透過一班朋友聚會認識,拍拖與否隨緣啦!」而Hubert亦克服了吊威吔傷頭的陰影,依然是個貪玩又大膽的「死小孩」!