導演谷德昭因疫情關系，由電影回歸電視，繼主持《納米無明火》後再有《爆谷一周》，節目已播到第二季，谷導除了希望長做長有變成長壽節目外，原來仲有由最初構思到現在都未能做到地方，好希望早日達成目標。講到幾時回歸電影圈，谷導坦承社會變化太快太急，仲需要時間好好模索，不過作為製作人講到新一輩藝人中最想合作，他首選林家謙。採訪：杜杜 攝影：沈健程 服裝：Wagamamaplayground
谷導跟《納火無明火》團隊合作愉快，他曾在節目解釋欣賞團隊心地好，這個亦成為搞《爆谷一周》的精神，「訪問時睇你立心良唔良，淨係要眼球要聲音，呢樣嘢係我同埋我團隊都唔想做，心地好係一個方向，做啲咩環節唔係度有趣，而係幫唔幫到人，觀眾睇會唔會有共鳴，同埋都可以有啲好嘅影響，譬如《納米》喺社交平台都引起啲討論，有個漣漪作用幫到人，呢樣嘢我想繼續喺呢個騷度出現。」
期待訪問國際巨星
作為主持的谷導，亦唔似一般清談節目主持譁眾取寵，會追問嘉賓八卦事，他選擇做個好心地的主持，「我都有被訪時，?家我去訪問人時用被訪者心理去諗，要對佢有一定了解。」而且谷導覺得每個被訪者都有成功之處值得借鏡，「就算你覺得佢好符碌，都係成功地令你覺得佢好符碌，佢一定有值得分享嘅地方。」他又承認特別看重年青觀眾，所以問題也特別為他們而設，「譬如我會問COLLAR佢哋每一個都係自卑，想話畀所有年青人聽，唔好成日覺得自己先自卑，其實每個年青人都覺得自己不足，覺得前面好迷茫，原來好多輝煌嘅人內心都係一樣，可能比起家長講，嚟得容易入耳。」
谷導坦承最初構思《爆谷》，受在加拿大讀書時睇的節目啟發，而節目每季13集，現在播到19集，第二季都播了大半，原來谷導有件事一直未有在節目做到，「最初傾有冇機會做Live show，或者做一個好貼近，譬如晏晝拍夜晚播，可以將時段拉近啲，我一路向呢個目標進發。」谷導坦承也希望變長壽節目，而且想版圖拓展，「?家啲外國電影冇咁鍾意經香港宣傳進入內地，但如果《Top Gun》上，Tom Cruise嚟我哋節目幾過癮，我可以見到偶像朴贊郁導演，我幾Q多嘢想問佢，或者張藝謀導演嚟香港，就想上呢個節目，我最希望做到咁樣，好虛榮嘅嘢。」
有望幫ViuTV拍劇
疫情較穩定電影業開始復甦，谷導卻仲未有計劃開電影，因有令他好困擾的問題，「第一係疫情完咗跟住點呢？成個巿場跟住落嚟會點？同我哋以前做開嘅巿場係好唔同，究竟拍戲、劇定網大？我都仲喺度觀察緊，點樣先可以叫到觀眾入戲院去睇戲？另一樣好困擾係以往我拍套戲，由我生到個idea到上映，我有信心係半年之內會發生，但?家拍一套戲大型少少，成個過程可能係一年至兩年，成個idea攤到凍晒。」谷導認為現在的速食文化，拍喜劇遇到的情況更嚴重，令他也考慮是否應改為拍劇集，「拍喜劇啲嘢想當造啲，但成日寫起咗，隔咗幾個禮拜就覺得好唔新鮮，定係諗個idea，直情生個劇出嚟，等佢可以長時間啲做，寧願喺人物下多啲功夫多過喺應景度。」所以他不排除跟ViuTV有另一種形式的合作。
講到作為製作人，新一輩藝人中除了已有很多機會的MIRROR外，谷導還有誰很想合作呢？谷導想了一陣就想到林家謙，「我覺得佢幾得意，佢好內向，但係好聰明，同埋佢timing係odd，我最鍾意佢唔似任何人，佢係original，搵人最緊要嗰個人係original同埋無可替代，冇咗佢搵第二個人差啲。」雖然谷導只跟家謙在鄭中基演唱會後台碰面合照，但已想到大概可給家謙演較貼近觀眾角色，「可能家謙係營營役役一個返寫字樓嘅後生仔，但係原來佢又另有抱負，已經好有得寫。」
星島新聞集團慶回歸25周年專題網站，請即瀏覽
