獨家丨謝君豪驚訝Edan掌摑戲求真打好感動 談善言主動介紹前度參演玩曖昧

59歲謝君豪跟32歲談善言在電影《過時•過節》首度演父女,雖然溝通不多,但卻有種無形默契,作為前輩的君豪更主動多謝阿談這好對手,令她受寵若驚。君豪亦跟呂爵安(Edan)初次合作,對呢位戲中兒子印象極好。另外兩人又大談鮮有公開的真實家庭生活,而阿談更首度分享跟舊愛黃寶漳(Mixson)的合作感受。採訪:杜杜 攝影:譚志光 髮型:Billy Hai@The Attic(君豪)、Larry Ho@Aveda IL COLPO(阿談)化妝:JulieH@jlab(君豪)、German Cheung(阿談)服裝:Weekend Max Mara(阿談)場地:FWD House 1881

君豪跟阿談雖然相差27年,但兩人合作相處融洽。
君豪跟阿談雖然相差27年,但兩人合作相處融洽。

 

阿談跟君豪第一次見面,已經見識到對方風趣幽默一面。
阿談跟君豪第一次見面,已經見識到對方風趣幽默一面。

 

君豪同阿談雖然在網劇《心冤》合作過,但因冇同場戲,所以今次才是正式合作,戲中兩人飾演一對溝通極少,但不失默契的父女,二人都覺得戲裏戲外都有同樣感覺。君豪說:「呢對父女講嘢唔多,係眼神交流,喺平時接觸嚟講,佢都畀到少少咁嘅感覺我,有啲戲裏面嘅關係,我好多謝佢幫到我。」聽到前輩的客氣話,阿談勁唔好意思,「你多謝我?我多謝你呀!」君豪解釋:「演員係要有對手可以彼此相信,互相承傳,所以真係要多謝佢。」

電影中一家四口每次同場都不歡而散,一段車程都可以嗌大交。
電影中一家四口每次同場都不歡而散,一段車程都可以嗌大交。

 

君豪最初睇劇本覺得角色好廢,後來才知「旭真」只是用自己方式去表達對家人的關懷和愛。
君豪最初睇劇本覺得角色好廢,後來才知「旭真」只是用自己方式去表達對家人的關懷和愛。

 

阿談讚君豪風趣幽默

君豪完全零架子,難怪阿談在圍讀首次見對方已緊張全消,「佢講對白好沉穩好有力,但同導演或者毛姐(毛舜筠)傾偈時,豪哥風趣幽默嗰面就走出嚟,令我有種冇咁驚佢嘅感覺。」她這種放鬆的狀況延續到正式拍攝,「我哋有啲戲冇排過,食飯戲或者喺車度啲戲,都係簡單望一望,好似戲入面嗰兩父女。」

戲中君豪演沉鬱父親,跟阿談演的內歛女兒鮮有溝通。
戲中君豪演沉鬱父親,跟阿談演的內歛女兒鮮有溝通。

 

「阿琪」跟家人關係不好,現實中阿談跟家人關係不錯。
「阿琪」跟家人關係不好,現實中阿談跟家人關係不錯。

 

講到戲中Edan飾演的兒子,跟君豪有不少衝突,他大讚Edan作為偶像零包袱,跟阿談一樣相當好學,令他最為感動,「都有傾吓偈,尤其是嗰場嗌交戲,又掌摑又盛,仲有ending嗰場兩父子和解戲,佢都好用心,好在意每個細節,會問點樣去投入個戲,好想知道好多嘢,好想令自己做得更加好,呢樣嘢係好難得,好可貴。掌摑戲會驚痛嗰啲,佢完全唔驚,仲坦白同我講『你用力,你嚟真啦!』我覺得感動,演員可以咁樣。」

君豪對Edan讚不絕口,就算當紅依然好想進步。
君豪對Edan讚不絕口,就算當紅依然好想進步。

 

君豪罕談跟囡囡相處

現實中開朗的君豪跟沉鬱角色剛好相反,與21歲囡囡采湳亦相處融洽,自覺是個風趣幽默爸爸的他更笑言:「唔知佢覺唔覺得係呀?相處都開心嘅,我有時都引到佢笑,都會成日吹水,哈哈!」他更自爆囡囡跟戲中囡囡有個細節不謀而合,「佢都係成日戴個耳機,但佢唔係扮聽唔到,反而係我以為佢聽唔到,同朋友講嘢,佢會無端端搭嘴,原來佢都冇開機!哈哈!」遺傳了爸爸活潑一面的君豪,跟家人的關係一直不錯,「我爸爸喺酒樓做廚師,以前交通唔方便,佢喺上水做,有酒席做完先收工,朝早又起身,所以放假先返嚟,雖然返嚟時間少,但返嚟都會同我哋玩,我記得佢會同我哋玩康樂棋,嗰時我得幾歲,輸咗仲喊,到我十幾歲想獨立會反叛啲,但衝突又冇,屋企人關係都幾好。」

君豪1994年跟太太戚婉儀結婚,2001年誕下女兒謝采湳。
君豪1994年跟太太戚婉儀結婚,2001年誕下女兒謝采湳。

 

阿談跟健談的爸爸關係亦不錯,「細個同爸爸都close,佢比較貪玩,會帶我去踩單車、行山、游水,反而大啲冇咁多溝通,佢做嘢好忙有時唔喺香港,但佢好錫我唔會鬧交。」反而她會跟家姐和細佬有衝突,「我同家姐會打交,試過中學時比較火爆,都唔記得因咩事我哋有啲推撞,一推後面書櫃就爆咗塊玻璃,要阿媽嚟阻止我哋,不過之後好快冇事。」

阿談除了跟父母關係好,跟家姐及細佬都好感情。
阿談除了跟父母關係好,跟家姐及細佬都好感情。

 

君豪審視與太太關係

戲中君豪跟飾演太太的毛舜筠,是對瀕臨離婚邊緣的夫妻,大部份時間都是毛姐在鬧他,而他總是默不作聲,這亦令君豪重新審視與結婚28年的太太戚婉儀關係,「我會諗戲裏面太太咁話我,扭一扭諗法,『佢鬧人個樣都幾可愛吖!』而毛姐見我鵪鶉咁唔出聲,又諗『佢唔出聲個樣都幾有內涵』,哈哈!事情咪解決,人火起嚟唔係百分百做到,但都會收一收韁,好似戲入面咁樣真係覆水難收,唔係鬧完就冇事。(對太太都一樣?)一定盡量要咁樣,唔好好嬲時鬧交,雙嗌唔好口,唔係咁意思都會講到更衰,對方接收再放大,收唔到科。」

君豪戲中瘋狂被毛姐鬧,亦令他審視跟太太相處方式。
君豪戲中瘋狂被毛姐鬧,亦令他審視跟太太相處方式。

 

君豪認為夫妻相處,一定要識得經常換個角度去想。
君豪認為夫妻相處,一定要識得經常換個角度去想。

 

阿談跟舊愛Mixson在戲中有段感情戲,原來最初是她主動介紹對方給導演,「佢本身又係backpacker,性格又有啲似,好似好熱情同人相處,但其實又好保護自己世界,呢個角色好啱佢。」她認為兩人合作沒尷尬,今次只單純做個介紹人,「我同佢拍過拖,知道佢係個咁嘅人,就覺得好適合佢,未必咁多港產片會用到混血兒樣嘅演員,只係覺得好啱佢,冇諗太多。」

阿談跟Mixson分手5年,再見亦是朋友。
阿談跟Mixson分手5年,再見亦是朋友。

 

阿談跟舊愛Mixson演對手戲,完全沒尷尬。
阿談跟舊愛Mixson演對手戲,完全沒尷尬。

 

 

 

即時娛樂