曾智華
上周日一年一度「婦女銀袋日」，莎莎集團巨額贊助，搞得有聲有色，美女如雲，男馬迷不少在沙圈睇到暈陀陀，馬都唔睇，因實在目不暇給也。
賽馬由外地引入，文化上，從來不強調賭博，而是由一項運動變為社交活動。所以，英國凡跑大賽，部分男馬主及嘉賓皆穿上燕尾禮服，女的則戴上禮帽或各式頭飾，燦爛奪目。
傳到來香港，凡「莎莎日」也如此，不少女士響應，搞到平時以博彩為主導的馬場衣香鬢影，賞心悅目，美女與駿馬互相輝映。
馬會及政府經常強調搞賽馬旅遊，已經兩年了，仍未見有幾多項具吸引性的新招出籠，是否要等江旻憓選舉成功，做埋代表旅遊界的議員，才倒轉向馬會獻計（我就不寄厚望了）？
個人觀察，馬會實在未食盡「莎莎日」（可能不便明益一個商業集團？），在這個日子，似乎並冇大型籌劃配合吸引外地遊客，尤其內地人，令沙田馬場萬人空巷，一齊體會充滿盛事感的賽馬日。
馬場咁大，是否可以在沙圈同時舉辦國際級頭飾選美活動呢？
而既然強調美麗女性，當日又可否邀請全球女騎師亮相，來一場國際女騎師錦標賽呢 （若水準不同，可用讓磅增加競爭性）？
另外，為吸引本地女士加入，應設定戴頭飾的，免費入場兼享用自助餐，再送紀念品。
今日我亂\u564f當秘笈，只拋磚引玉，希望馬會不要浪費「婦女銀袋日」，火速將賽馬旅遊Upgrade，成為吸引遊客重點活動。
今晚又有得玩兼興奮死，因世界第一高手麥道朗登場，估計與佢最老友的練馬師沈集成，必會提供最佳機會馬匹接風，「領創動力」及「龍文鞭影」買W可也。
