星8卦|「平嫂」嫁偶像粉絲變老婆 癡迷成狂成屋都係佢老公

新春大吉,無嘢好做,難得「平嫂」叫到,嗰日就去咗佢同老公間別墅開年,順便派吓利是畀兩位小寶貝。老公係邊位?勁㗎,講出嚟無人不識,仲好鬼紅,有華人地方就有佢啲粉絲。

平嫂同老公經歷好多,呢段感情好真摯,大家都知平嫂本身係佢老公超級大粉,但愛到咁癲狂,真係要行入佢哋嘅愛巢至深切體會到。
 
一入門口就見到電視播緊老公演出嘅電影,一套接一套咁播,平時已經日日播住,咁啱呢晚大家帶咗啲小朋友,我就提議唔睇電視播啲音樂啦,哈,平嫂就開始播老公啲經典金曲,一樣非常洗腦,聽咗成晚,腦入面到依家仲係嗰啲歌詞,由唔識變到背得出。聽到悶行去廚房搵嘢飲,打開雪櫃,嘩,見到嘅都係佢老公代言嘅飲品,最最變態係乜呀?後面有啲唔係老公代言嘅,平嫂就好鬼馬咁全部貼晒自己老公個樣上去,佢咁有心思又咁得閒,大家真係估佢唔到。
 
至於平嫂派嘅利是,仲駛講,全部自家印製,係老公嘅嘜頭,總有一封派俾你。咁都唔厲害,全晚你講咩話題,平嫂都可以拉到落老公嘅範圍,簡直係天下第一小迷妹,突然之間明白點解佢老公要揀呢位大纜扯唔埋嘅女人,因為無一個男人唔享受俾人癡迷崇拜,係世界最重要嘅感覺,平嫂,你好嘢!
 

 

 

【相關文章】:

星8卦|「孝哥」縱容爛賭老婆輸身家 妻債夫還捱到病

星8卦|太太羅美薇神隱廿年 揭張學友狂推job之謎

星8卦|模範夫妻爆離婚!小雲出軌發姣派帽 吉仔用成副身家箍煲

即時娛樂