很多很多年前，有一個時任高官對我講：「香港經營公共交通，若靠收車費，蝕死未天光！」
事實，強如港鐵，若果冇樓盤、商場、廣告、八達通……等「搵錢機器」，單靠車費收入，真係「你做埋我 份」都得 。而事實港鐵收費比起其他公共交通，已是最貴，都唔掂！
以前點解有財團「捱義氣」做巴士、電車及渡輪？邊會死錯人 。一方面，現金收入量龐大，日日收。另外，政府好識做。即係你願意啃「豬頭骨」廉價交通服務？我就靜靜雞醒幾隻鮑魚（地皮）畀你。你在A蝕咩，咁在B就賺返到嘔，得啦 ？
所以，大家就會見到，N年前的中巴、九巴、電車，以至近二十年的港鐵，全部皆非靠交通收費「發」，而是將廠房地皮 去補地價，再起豪華住宅及商場搵大錢的，明未呀老友？
好 ，再睇睇，如今天星小輪點搞呢？碼頭個維港海景當然靚到震，但可唔可以在上面起餐廳、商場，甚至豪宅呢？若果得，天星小輪絕對可以免費任搭！但唔得喎。
此服務，以前的確不少市民需要，另加到港遊客必搭，故此仍可作「雞肋式」維持住經營。
但疫情後，再加上港鐵過海線猛開，上下夾攻，尤其大熱天日子，邊個會成身汗行去碼頭上船呢？將心比己，好易解釋為乜天星小輪拍晒烏蠅，過去三年蝕到眼坦坦！
加價有冇用？當然有，但微。若要基本翻身，必須每年千萬計遊客重臨外，政府更要大改政策，畀天星小輪一條生路行，以善用碼頭增加收入。否則，好易變成一拍兩散。老友，天星小輪由商業集團經營，若年年蝕幾千萬元，大中小股東點解要頂落去？慈善事業乎？政府津貼乎？若乜都唔係，公司決策層為乜要死頂？
如今小恩小惠小修小補，甚至加三兩蚊，根本只是吊鹽水，始終冇得搞。
唯一方法，吸引財團大量投資，將天星碼頭變為商業餐飲中心，利用維港景吸客，再將賺到的錢補貼交通服務。否則，天星小輪好快變集體回憶！
