為乜冇剃毛?

生活在香港,真係想悶都好難。因為不停有新聞爆出,簡直幕幕高潮幕幕金,有的更是金兼勁。上周就有一單,真係笑爆嘴!

  好日唔見報,經已八十一歲的前教育署署長余黎青萍,突然變曝光人物,提供一單人人奔走相告,笑到碌地的「新聞」。

  因佢失驚無神在監警委員會會議中,正在討論虐兒案時,忽然似「師傅上身」,炮轟TVB《香港小姐競選》穿得「太少布」,間接指有賣弄色情之嫌,更拉埋堂堂總經理曾志偉落水。

  當時,余太恍似「道德重整會主席」從天而降,搞到現場委員及新聞界窒一窒,再笑到噴飯。

  佢言詞之中,竟涉及暗指志偉利用職權睇三點式。

  嘩,呢個指控,立即令TVB高層彈起!大大聲譴責余黎青萍言論影響港姐選舉形象及聲譽,揚言對不實指控及惡意揣測,保留一切法律追究權利。

  我看,此事純屬茶杯\xf9堛滬楫i,應該好快拆掂。相信余太並非有動機地刻意針對無記,不過,老人家間中順口「老氣橫秋」,通街都係,司空見慣也。

  TVB其實應靜靜雞多謝青萍婆婆。因佢一鬧,嘩,成個港姐選舉由冇乜人留意變成全城關注,更一路追落去睇事態發展。如此,肯定多十零二十點收視,廣告費可以提高 。

  講返選港姐穿泳衣,根本幾十年前已如此,難道有人過去半世紀是活在夢中的?

  講單小弟親身見證的尷尬料。一九七八年,我在《歡樂今宵》做個小小助導,某晚參與製作一個在碧麗宮(已蒸發)舉行的大騷,為的正是要將當屆港姐選舉谷到變全城盛事。公司Call齊全部候選佳麗,穿著三點式表演。綵排時,突然間殺出個女高層,向住台上手指指大叫:「十七號(假設),為乜你冇剃毛? ?」

  嘩嘩,咁都講得出口 ?真係嚇到我呆 ,更何況「十七號」?現場幾百人望住佢,真係「紅都面晒」要搵窿捐!

   時小弟先開始知,原來體毛是女性曝光禁忌,所以,一條都不能見光!

Uncategorized