等咗7年，42歲嘅張繼聰宣佈將於10月15日，在麥花臣場館開《Welcome to Route 37》演唱會，仲會陸續自資出新歌配合「回歸」音樂之旅！阿聰形容自己係中年人，夾喺MIRROR及張敬軒中間。回想當年被雜誌大字標題寫係「廢柴老公」，阿聰坦言心靈受創，幸得長輩開解，令他置諸死地而後生，因此也特別關顧年青一輩，尤其MIRROR：「今次嘅嘢冇人經歷過，想像唔到佢哋嘅傷害有幾大！」採訪：方騫平 攝影：羅安強
張繼聰再戰樂壇有段故，原來他本打算專心做演員，一早已收埋所有結他，直至兩年前爆發疫情，因為留家抗疫好無聊，加上當時正值40歲，令他突然叮一聲有唔同嘅睇法，「我哋呢個年齡層嘅經歷，年輕人未必會明白，但又冇乜歌表達到中年人嘅情感，所以我自資做歌，單係製作7首新歌連MV，就算慳住使最平夾埋要70萬，既然能力負擔到，當係送畀自己及知音人嘅禮物，最多唔買電單車。」
出歌冇諗過攞獎
由於本業係演戲，唱歌對阿聰來說冇壓力，更加冇諗過要攞獎，講到明用嚟自High：「中年人都鍾意聽歌，做Show又好好玩。」他又直言老婆謝安琪(阿Kay)都好支持他玩音樂：「老公都唔支持，佢支持邊個呀？每個人都有興趣，所以你哋要買飛入場嚟支持我呀！」不過，阿聰強調唔會同阿Kay喺演唱會上合體：「我哋都抗拒，冇乜好睇啫，佢開咗咁多次演唱會都冇請過我做嘉賓啦！其實我成十年冇開show，我先至係自己演唱會嘅嘉賓，反而想佢喺後台打點，同埋喺台下專心欣賞，返到屋企畀個『賽後報告』我。」
置諸死地而後生
07年，張繼聰跟謝安琪奉子成婚備受批評，之後又被雜誌以「廢柴老公」作稱呼並用作封面。「人生要經歷呢啲，唔死先會去到另一個階段，唔肯認係廢，只好畀心機做好啲。不過嗰段日子成個家庭都受傷害，邊個父母想個仔咁畀人話？但冇嗰段經歷，唔會有之後嘅感受，之後做演員會易啲明白，更加學會Care人哋感受，唔會亂開玩笑令人受傷。」問到今時今日，係咪可以好自豪地平反「廢柴老公」之名？他答得淡然：「?家點講都冇所謂啦！鍾意嘅人就會鍾意你，我睇返自己20幾歲結婚生仔算好勁，默默耕耘寫歌，雖然係窮啲，但養得起老婆有乜問題？」因此，阿聰特別疼錫年青人：「佢哋可以隨時搵我傾偈，就算工作，心理都要快樂。」
對於MIRROR演唱會事故，阿聰好擔心佢哋有創傷後遺症：「佢哋梗係可以搵我(傾偈)，想像唔到佢哋嘅傷害有幾大！件事真係好慘，唉！唔識講呀！因為冇人經歷過，不過佢哋好叻好乖，希望畀啲時間佢哋好好照顧自己，尤其唔好忽略自己嘅情緒。」
