有不少人對燒街衣這回事，為之卻步，心頭總會生起一陣寒意。即使平日經常跟我參加宗教活動的同事，聽咁多經，拜咁多神，一提到燒街衣，都會耍手擰頭。
「一陣容乜易招惹到靈體，跟埋我返屋企，咁咪弊傢伙？都係唔做唔錯囉，咪搞我！」
怕鬼的心態，當然明白，其實只要你了解燒街衣的背後意義，便會知道，這個傳統習俗，是有很好的無為功德。
當你見到街角有一個老邁婆婆在行乞，你會動起惻隱之心，放下二十蚊，然後離開。
當知道有某一宗工業意外發生， 唯一的家庭經濟支柱不幸命喪，遺下孤兒寡婦，頓失依靠。即使大家素未謀面，你都會感到人家「真係陰功」，會主動捐一千幾百元，幫得幾多得幾多。
這些善事，你不會懼怕去做，絕對願意伸出援手。而燒街衣，都是善事，幫助來自陰間的可憐鬼。
在盂蘭七月，鬼門關大開，大量無主孤魂湧到陽間，四處遊蕩，無家可歸，無後人拜祭，長年極餓極渴，苦不堪言。
如果你為這些三唔識七的遊魂布施，在街邊點起一炷炷香，預備芽菜、豆腐、龍眼、白飯，供他們飽餐，再燒紙錢，好讓滿載上路。如此善行，跟你派米給低收入家庭、派免費飯盒給長者無異，同樣出於一片愛心，都能積德行善。
那些遊魂真係多謝你都 唔切，因為要搶食嘛！又怎會加害於你這個大善人呢？難道收了你白飯的長者，會跟著你回家，纏擾不放手嗎？你不求回報燒街衣，得到的，將是遊魂們感激的道謝。所不同的，只是你不會聽到而已。
在夜深的街上，熊熊香火燃起，我看到慈悲。
