Netflix平台上，乜種類電影、電視劇都有，有的經典製作，也有現代製作。
同時，也擴闊到大量不同國家出品。若果冇N記，香港人好難知原來土耳其及印度製作，水準可以咁鬼高，尤其毋須好似荷里活咁，大都是用錢錢錢堆砌出來而文化單薄。
既有如此多品種，放在同一平台，咁就出現——不怕不識貨，最怕貨比貨。套套放在同一水平上比試，於是，「邊個冇著褲」，一眼睇晒。事實，超過五成作品，小弟只睇五分鐘就收工，無謂浪費時間。
有件事好奇，以N記的管理層咁精明，睇盡咁多精品，到自己出品時，應該冇理由拍垃圾 ，係咪？哈，原來唔係！尤其是億億聲（美元）外判的，經常畀 大導演、大明星當水魚撳，不但交行貨，間中簡直交垃圾！
最經典例子為《紅色通緝令》（《Red Notice》），去年上架，由大隻佬狄維莊遜、賴恩雷諾士及姬嘉鐸（以色列小姐）主演，如此卡士，若正正式式拍一套大電影，邊有得輸 ，反之，應該是質素保證。點知，唉，爛到出汁！真係MM聲（睇 十五分鐘已經忍唔住）。喂，十一億港元的製作，竟然拍 咁屎出品，點解N記會收貨？另外，幾個大明星掠完天價片酬，交出如此質素演出，究竟有冇演員道德？
N記一套又一套巨額製作垃圾出籠，《超時空亞當計劃》也如此。
最新上架，又係大卡士，靚仔巨星萊恩雷諾斯擔正主角，監製及導演更用到荷里活A級的羅素兄弟。
又係，若真真正正拍套荷里活大製作，點會失手？今次呢套《灰影人》（《The Gray Man》）又如何？
若論製作技巧、電腦科技、爆破打鬥、氣氛製造，合晒水準，不過……唉。
唉乜呢？因為劇本大話西遊，犯駁處處，將美國CIA搞到似無厘頭亂 謀殺中心，毫無邏輯與章法。咁爛劇本，導演會飛都拍唔出有格調電影啦。今次N記又再浪費十幾億元！
