呂爵安成立收費個人官方歌迷會 「爵屎」內訌不滿未換admins

MIRROR成員呂爵安(Edan)有唔少「爵屎」(Fans暱稱),但最近卻出現歌迷內訌事件。話說昨晚(25日)喺Edan粉絲群組的admin宣佈,將會成立收費個人官方歌迷會,但竟惹來「爵屎」極度不滿叫Edan「找數」換admins班底,原來早喺大半年前喺種種原因下,「爵屎」要求Edan更換admins班底,Edan答應後卻未兌現承諾。雖然Edan工作忙到癲,但都有顧及「爵屎」感受,火速喺群組內打千字文「拆彈」,仲解釋冇換admins班底係公司嘅意思。

 

呂爵安話頭醒尾,又唔作狀,好得人心。

 

Edan說:「大家好,知道大家有好多嘢想了解,好明白亦好正常的,我而(?)家就解答一啲大家嘅疑惑。」他表示:「見到好多人問點解話處理,但隔咗咁耐都唔處理(換admins班底)?其實當初FC有事發生,我都即刻同公司匯報,而公司嘅feedback係唔希望我再參與任何有關FC嘅事宜,希望我專注返做好自己嘅工作,FC嘅事情就交由返公司去處理,所以嗰次之後我就冇再去處理,交哂畀公司。」

 

Edan寫長文平息「爵屎」不滿。

 

他再說:「而我得知嘅結果就係,公司唔希望我將admins們換走,因為始終牽涉到好多金錢上,保密上等等嘅問題,所以公司希望保留返原有已經建立了信任嘅admins,亦希望佢哋可以成立一間公司,更好咁聚集每一位爵屎,更有效率咁運作一個Fansclub,而admins們亦承諾會盡力做好,吸取過往嘅經驗,繼續為大家服務。」

 

Edan望「爵屎」可以冷靜少少。

 

Edan最後好感恩愈嚟愈多人加入「爵屎」大家庭,愈嚟愈多人喜歡呂爵安。他又為admins同事護航:「由於爵屎人數愈嚟愈多,admins可能真係負荷唔到現有嘅工作量,所以公司同admins們決定將會在演唱會後重整FC,招募更多admins,詳細方案將會在稍後公布,希望此舉可以壯大FC,加入更多不同的意見,有更多力量去運作,知道大家係因為愛我先會咁緊張,我亦希望FC會在未來變得更好,希望大家可以畀多啲時間公司同admins們去處理。」

 

Edan話,公司同admins們決定將會在演唱會後重整FC。

 

Edan世界各地嘅「爵屎」愈嚟愈多。

 

Edan主演嘅ViuTV新劇《I SWIM》即將喺7月11日晚開播。

 

星島新聞集團慶回歸25周年專題網站,請即瀏覽

即時娛樂