上周六原來小弟碰正「馬神」都唔知！當天早上，與家人同到沙田馬會食早餐，電梯之內碰到練馬師賀賢，我禮貌式打個招呼，然後話：「你明天手馬好勁 ，應該連場前列返來。」佢笑笑口回應：「希望係咁啦，你捧少少場啦！」
講完，大家分道而行。我睇睇排位，的確，兩隻實力馬「勝利才子」及「馬爾代夫」應有機會W。
點知，嘩嘩，翌日開跑，講都冇人敢信，賀賢出七場，四場中Q，當中三場爆大冷，「日新月著」、「明欣賞」及「勁駒」，位置分別派一百九十三元五角、一百一十二元五角、一百一十元，仲勁過頭馬！而Q呢，更 命，分別是五千七百三十八元、一千六百五十元及一千一百二十八元！
哈哈，原來我撞正馬神都唔知，走晒寶，真真唔係你財，唔入你袋呀老友！
最後一個大賽日，薛恩繼續威威，直落三場W，掃埋一級賽「遮打盃」。今季佢同希威森可講脫胎換骨，馬迷眼睛雪亮，見到兩人陣上的誠意，肯定起立敬禮。今季「最受歡迎騎師」，一定冇拉叔及潘頓分，而只是薛恩與希威森之爭，希威森更應該 埋「飛躍進步大獎」！點解佢有如此明顯改變？原來除鄉里韋達給予提攜外，更重要，正是薛恩這位老大哥不停替佢做心理輔導，並以自身經驗作分享，加以鼓勵。
新人無論幾有高天分，但EQ及AQ仍多不足，若有前輩在旁指導、安慰，而佢又有悟性的話，咁就會出現飛躍進步 。
另一位在人生及事業方面慢慢開竅者，正是本土騎師蔡明紹，由彗星般一閃而出到受打擊低沉，再成家立室做埋爸爸，慢慢成熟過來，今季贏硬「告東尼獎」喇，可喜可賀。
睇睇今晚跑馬地賽事先，「快活谷炸子雞」希威森騎八隻，當中三隻來自蘇保羅。而蘇廄今晚只出四隻，咁安排，「合該有事」！
簡單，小弟一於三隻買晒W，包括「好好心得」、「騰龍超影」及「極速滿貫」。
唔刨賽績 ，因刨都 氣也！
