（曾智華）
今時今日做飲食，賣點可有N咁多。今日介紹一家食物未入口，眼睛先吃飽的店子。
因又有商務午餐要在尖沙嘴區進行，傾的合作，唔「衰」得，故此一定要搵氣氛優雅舒適菜館與對方見面，以便大家「一擊即中」！
再去電「尖沙嘴食后」老友「慈母許」。
「碌Sir，今次去『映水芙蓉』啦，應該達到你要求，午餐消費五百元以內，足以試勻幾個招牌菜，由賣相到味道都好得！」
信晒「慈母許」，立即訂位。中午步入，嘩嘩，果然冇講錯，位置就在維多利亞港海旁的海運碼頭OTE。落地玻璃望出去，當日天朗氣清，先「食」呢個全球獨一無二的美景，已知呢餐肯定——冇得輸！
此店以西洋品味混合古雅中國之風，由設計到所用器皿，全部精心考究，一碗一杯一碟皆精品，細心又細緻。
「慈母許」早早囑咐要食：敲糖棒棒雞、千絲西葫蘆、孜然羊架、肉汁蘿蔔芯、瀘沽湖紅米飯及甜品紅糖 粑。
小弟對孜然這種香料敏感，沒試，其他全部先欣賞賣相，打卡（如今高檔菜館，對於Presentation非常花心思，必有點點美感，甚至藝術氣質），不可浪費廚師心血也。
幾味菜式中，我尤喜歡千絲西葫蘆及瀘沽湖紅米飯，前者絕對是廚師的刀章功架大晒冷，將青瓜絲切成幼面條狀，難度頗高！
至於後者，肯定全港獨有。速速上網搜尋此湖在何方。
原來瀘沽湖又名落水海子，是個高原淡水湖，位於雲南省，湖面在海拔二千六百九十米，未被污染，故湖水透明清澈鮮甜。
上 的紅米飯放在燒得高溫的石鍋中，由經理緩緩將湖水煮成的靚湯淋下，發出吱吱響，蝦膏味立時滿布空間。一啖入口，正！
呢頓午餐，令眼睛及肚皮均大大滿足，如此情況，談合作當然水到渠成，喜氣洋溢握手作實。係乜呢？大家不日就知也。V
