關心妍重提「攞錯獎」被批評 5歲囡囡睇片心痛爆喊

出道20年的關心妍(Jade)近日接受港台《舊日的足跡》訪問,她表示自己用了第一個10年去追夢,而之後的10年人生就更精采:「人生應早啲經歷甜酸苦辣,我無悔!當中係好刺激、好難頂、好瘀,但呢啲正正係人生,我哋只會活一次。依家我40幾歲開始倒數,唔可以再揮霍光陰。」

20年來,關心妍要感謝三個人,包括關媽媽、羅傑承和丈夫:「媽媽喺我面臨失業時冇收我家用,又畀我好大支持。第二個要多謝我第一位老闆羅傑承,冇佢就冇關心妍。第三位當然係我老公。(是否三億老公?)當然唔係,信一半都死!佢改變咗我好多對於婚姻同愛嘅睇法。我以前冇父愛,唔明乜嘢叫被愛。我好強,因為冇人係身邊呵護我。佢嘅無微不至令我變得小鳥依人,我先知道原來自己係女人!」

 

關心妍失業時,感激媽媽唔收家用。

二人拍拖2年幾,老公就向佢求婚。

 

曾為「關家姐事件」想報警

提起「攞錯獎」一事,外間都記得關心妍多年前在一次音樂頒獎禮上的尷尬場面。她謂最近女兒練習跳舞時看見當時的錄影片段,哭得很淒涼,問為何其他人要批評媽媽:「我安慰佢要堅強,堅強先至可以面對逆境,所以我而家唱歌就係要唱一啲有意思嘅歌,並唔係為咗攞獎。我日後會唔會出席頒獎禮就留畀公司去決定,至於我自己暫時就未有呢個諗法。」

關心妍人生中的另一挫折,莫如「關家姐事件」,令當時正走紅的她人氣下跌。重提此事,她感到相當無奈:「當年人氣急升,鍾意你嘅大有人在,但係唔鍾意你嘅人亦多,如果把關唔好,會好危險!(當年)突然有一篇潮文話我去名店買衫,要人家封舖,店員唔肯,結果被炒。發文嘅人係店員嘅弟妹,直指我人格差。其實當時我忙到不得了,差啲連瞓覺嘅時間都冇,點會有可能去行名店?我嘅衫全部由設計師準備,而家我做咗人太太就有可能去 Shopping。網上流傳咗十幾年,到而家邊個係家姐、邊個係細佬妹、邊間舖頭都冇人出嚟認……我澄清過,但我喺鋒尖上面。而家就話可以喺網上fight back,但以前就係信不信由你。」她透露當年曾想過報警,但最後決定不再糾纏,想不到文章每年都會出現,她指「我有信仰,上帝知道我冇做過」。

 

當年關心妍喺台上「攞錯獎」,關菊英幫手解圍。

咁尷尬嘅場面,關心妍話囡囡睇片都喊得好淒涼,唔開心媽咪被人批評。

 

5歲囡囡將做紅館演唱會嘉賓

關心妍即將舉行第三次個人演唱會,五歲女兒心心主動提出上台客串:「我揀咗合唱《Smile》,係我懷住佢時送畀佢嘅歌曲。好搞笑,佢要求唱完後打個側手翻,因為佢立志做柔軟體操運動員,好鍾意打關斗…..我嘅服裝設計師陳華國為我準備咗六套衫,應該好有舞台效果。大會又為女女準備咗一件全部釘哂石嘅晚裝,可能件衫仲靚過我!哈!」

 

囡囡主動會上台演出。

接受車淑梅訪問。

 

更多最新疫情資訊,請到以下專頁瀏覽 按此

即時娛樂