（曾智華）
醒喇醒喇， 足幾個月，終於醒喇！
邊個？正是馬會競賽小組班「糊塗董事」！
睇開本欄者，應知小弟由季初開始，多次指出今天的莫雷拉，已非昔日的莫雷拉。以前是「黃飛鴻」，如今是「石堅」，並多次提議大家睇巡邏影片，「欣賞」下佢如何表演「石堅式」跑法。
可能競賽小組及莫雷拉從不理會中文馬評界輿論，又或根本冇人翻譯畀佢 睇，所以，雖然噓聲震雲霄，仍然次次玩「開局」。監管者唔郁手，被監管的，仲唔放肆？
從此「雷神」不再，反之「拉縮」形象日漸鮮明。尤其潘頓墮馬受傷日子，冇晒對頭人，更加喜歡點跑就點跑，馬迷無不畀佢吹到脹卜卜。終於可能競賽小組都聞到 味，知道再唔做 ，必演變成眾怒難犯。周三晚第八場，相信不少馬迷及馬評人皆有掟爛電視的衝動（個個冇得入場，只能睇電視）。「拉叔」騎大熱門「二雋」，擺明冇得輸，因馬Fit兼鬥心極強。故此，雖然莫雷拉用盡「柔性」跑法，隻馬仍然自己想去。呢場好明顯「拉叔」唔想（不能？）去，否則有手尾。於是堂堂國際殿堂騎師兼四屆香港冠軍，到最後五十米手忙腳亂，唔知點搞，只好來一招垂手停催。
即係點？即係「唔去」，犯天條！一過終點，全港震晒，嘩嘩嘩，咁跑都得？除非競賽小組班董事全部盲晒，否則豈可不大刑侍候？
終於監管者問話譴責，騎師則好似有「默契」咁，即認，判停賽六日。「唔去」罰六日？小弟認識的所有資深馬評人，無不譁然，有冇再輕 ？
一貫如此，有人被「打手板」後，所有騎師會即時變醒定，令接著的賽事短暫正常。
由此觀之，明天爆冷機會冇乜 。而莫雷拉咁搞法，醜死鬼，明天會否心神恍惚，大家要臨場細心觀察了。
兩場一級大賽，宜睇不宜賭。我最有興趣睇睇唔識輸的「八仟師」換 騎師，再大蝕分情況下，會否仍然橫掃？
