（星島日報報道）日前黃子華、張繼聰及王菀之接受TVB節目《StarTalk》專訪，大談合作新戲《飯氣攻心》的感受。王菀之直言與子華合作大感緊張，她說：「好彩之前客串過子華執導嘅電影，有咗上次嘅合作，今次冇咁驚，一開工已經有種親和力！」
談到電影令觀眾更珍惜與家人同枱食飯，張繼聰說：「我同父母一齊住，外母又住得好近，所以成日一齊食飯，𠵱家同屋企人食飯係最期待嘅娛樂，好珍惜同家人相處的重要性。」子華就表示：「我覺得電影有一種莫名奇妙嘅溫暖，我會返屋企食媽咪煮嘅飯，最重要係無論佢煮咩都唔可以彈，一定要食晒，一定要講好食，打包埋返屋企更好！」王菀之亦透露：「最開心會同爸爸去老爺奶奶到打牌，我嘅技術係可以去到佢哋成日想搵我打！」