七仙羽（七師傅）喺ViuTV節目《七救星》中安排過J.Arie(雷深如)體驗瞓街滋味及去半山區吸靈氣斷窮根，之後J.Arie果然大翻身，做完伍仲衡演唱會嘉賓後獲主辦單位邀她開show。等咗8年終於開到首個售票演唱會，她揚言要玩爆佢！可惜古老闆話拍戲嚟唔到，但有拍片去鼓勵她。採訪：方騫平 攝影：葉君海 髮型：Bowie Lo @ AdmiX Styling 化妝：Jessica Chan 場地：貳叁書房Jisaam.books
J.Arie將於本周五假海洋公園怡慶坊舉行《PERFECTLY GUILTY LIVE》，今次演唱會主題係Perfectly Guilty(有罪惡的人)，要赤裸呈現自己唔係善良嘅人，所以堅持用全裸概念影演唱會海報：「影相當日我只係貼乳貼，下身着咗條裸色T-back仔，在場有男工作人員，其實全身差唔多係睇到晒，但都唔理豁咗出去，人生點都要試一次。哈！真係可以收山。」阿媽好擔心出Show唔着衫
雖然J.Arie咁盡地一煲，但有網民唔多欣賞，彈佢醜樣冇身材冇興趣睇！J.Arie笑說：「咁都夠膽死？係呀！要以身作則將歪理衰嘢呈現嘛！亦希望大家坦然面對自己係乜人。父母好擔心，阿媽多次追問『演唱會度着衫㗎嘛？』真係好好笑，着衫定義係乜先？」自認係激死父母系列嘅J.Arie事先張揚個唱內容會好激，唔知父母頂唔頂得住，肯定會喺台下黑面。
