王菀之（Ivana）與音樂人伍仲衡為紀念相識逾20年，攜手合作推出專輯《仍然記得嗰一次》，Ivana感激伍仲衡成為自己的「伯樂」帶她入行。雖然專輯於大半年前開始構思，但音樂製作只花了兩個月時間光速完成。為配合專輯日與夜的意念，Ivana與伍仲衡分別走訪多個景點影靚相，包括咖啡店、大排檔、水果檔及舊式唱片舖尋寶。
回想與Ivana第一次碰面，伍仲衡說：「大約21年前，由朋友介紹Ivana幫我唱demo，我第一次聽到佢把聲，嘩好好聽，點知佢仲識寫歌，於是佢幫我唱demo，我幫佢做demo，好快佢嘅歌由張學友唱咗（《我真的受傷了》），成為大家都好鍾意嘅歌，後來Ivana讀完書返嚟香港做歌手。」伍仲衡覺得以專輯去紀念一段友誼是「好威水」的事情，因為此份「禮物」用錢也買不到，兼且是長青，加上今次參與製作部份更多，他笑言：「係完全屬於我嘅Baby！」
