等足大半年，林作與鍾培生的「百萬大戰」今晚（9月18日）終於打得成！林作和鍾培生的對戰掀起全晚高潮，鍾培生作為「主人家」，出場方式非常特別，除了開場前有數分鐘的動畫外，又站在有龍形擺設的升降台從天而降，在煙火陪襯下出場，認真有氣勢；相對林作的出場時間不足一分鐘。
二人進行四個回合賽事，雖然鍾培生積極進攻，但林作每當被打中都會攬着鍾培生，又在台上跑來跑去，閃避鍾培生攻擊，被拳證多次警告，連評述員都譏笑他是「Running Man」以消極態度作戰，台下觀眾也噓聲四起。雖然林作消極作戰，但都曾擊中鍾培生，而鍾培生也多次打中林作頭部，更打到林作爆嘴，明顯見到傷痕，最後鍾培生在沒有K.O林作的情況下勝出比賽，但雙方人員在賽後發生口角，要大會工作人員調停。
林作賽後表示很開心，但不小心打爆鍾培生個鼻，笑謂多謝鍾培生安排賽事，希望對方將來可以再接再厲，以雙倍的出場費邀請他再打過。鍾培生則表示林作雖然在台上瞓底又不停走開，但起碼能堅持四個回合賽事，又說有重拳打到林作爆嘴，強調自己個鼻無事，他說：「希望經過呢次，林作可以小心啲講嘢，要學識尊重人，唔好再蝦女人，唔好抽水，希望畀到佢教訓。林作抽我水，擂台最公平嘅地方，係可以好公平去打一場，但過咗呢個騷大家記得林作40比34，3個裁判一致決定我打爆咗林作、打爆咗佢個嘴。」當大家以為賽事已經結束，身穿金色西裝的尹光突然出場，他恭喜鍾培生成為「拳擊聖手」，笑言要出來唱歌為他慶祝。
